پاݨی چووی کروڑ پاکستانیاں دی لائف لائن اے، بھارت سندھ طاس معاہدہ کوں ہک پاسہ ختم نی کرسڳدا، سینیٹر محمد اسحاق ڈار

اسلام آباد۔25اپریل  (اے پی پی) نائب وزیر اعظم تے وزیر خارجہ سینیٹرمحمد  اسحاق ڈار آکھیا جو پاݨی چووی کروڑ پاکستانیاں دی لائف لائن اے، بھارت سندھ طاس معاہدہ کوں ہک پاسہ ختم نی کرسڳدا۔ کہیں پاکستان کوں میلی اکھ نال ݙٹھا تاں جواب ماضی وانڳوں ݙیسوں۔ پاکستان بھارت نال ہرقسم دی تجارت معطل کر ݙتی اے، جئیں اچ تریجھے ملکاں توں تھیوݨ آلی تجارت وی شامل اے۔ واہگہ بارڈر کوں فوری طور بند کر ݙتا ڳئے۔ جمعے کوں سینیٹ اجلاس اچ سینیٹر اسحاق ڈار بھارت ولوں سندھ طاس معاہدہ ہک پاسہ ختم کرݨ دے اعلان تے شدید ردعمل ݙیندیں ہوئیں آکھیا جو اے معاہدہ ہک اہم اتے متفقہ بین الاقوامی دستاویز اے، جئیں کوں کوئی ہک فریق ولوں ختم نی کیتا ونڄ سڳدا۔ انہاں آکھیا جو معاہدے اچ نشابر لکھیا ہوئے جو ایندی منسوخی صرف اتفاق رائے نال ممکن اے۔ نائب وزیر اعظم آکھیا جو پاݨی چووی کروڑ پاکستانیاں دی لائف لائن اے، بھارت سندھ طاس معاہدہ کوں ہک پاسہ ختم نی کرسڳدا۔ انہاں خبردار کیتا جو آندے ویلھے جنگاں پاݨی دے مسئلے تے تھی سڳدن۔ ایں کیتے پاکستان ایں بارے کہیں قسم دی نرمی کائںا کریسی۔ انہاں آکھیا جو قومی سلامتی کمیٹی گزریل ݙینھ اہم فیصلے کیتن۔ اتے حکومت سیاسی قیادت نال ہم آہنگی اے۔ اساں سیاسی فیصلے کر ڳھدن اتے ہݨ اساں ہک پیج تے ہیسے۔ سینیٹر اسحاق ڈار آکھیا جو سفارتی سطح تے وی اقدامات کیتے ویندے پئن۔ گزریل ݙینھ غیرملکی سفیراں کوں صورتحال تے بریفنگ ݙتی ڳئی اے۔ او ساری سیاسی جماعتاں دے شکر گزار ہن جنہاں بھارت دی اڄوکی جارحیت دا متحد تھی تے منہ بھن جواب ݙتے۔ سینیٹ اجلاس اچ ڳالھ مہاڑ کریندیں ہوئیں وزیر خارجہ اسحاق ڈار آکھیا جو پہلگام واقعے دے بعد اساں انتظار کریندے پئے ہاسے جو اڳوں کیا ڳالھ ٹرسی، انہاں پاکستان دا براہ راست ناں نئی ڳھدا، کوئی ثبوت کائنی جو پاکستان کوں ایں واقعے نال لنک کیتا ویندا۔ اسحاق ڈار آکھیا جو معاہدہ ہک اہم اتے متفقہ بین الاقوامی دستاویز اے، جئیں کوں کوئی ہک فریق ولوں ختم نی کیتا ونڄ سڳدا۔ انہاں آکھیا جو معاہدے اچ نشابر لکھیا ہوئے جو ایندی منسوخی صرف اتفاق رائے نال ممکن اے۔ انہاں آکھیا جو 26 ملکاں کوں کل بریفنگ ݙتی ڳئی اے، ٻئے کوں اڄ ݙتی ویسی۔ اڄ سعودی وزیرخارجہ میں نال ڳالھ کرݨ چاہندن۔ اڄ شام ست وجے ڳالھ تھیسی۔