پاکستان پہلگام واقعہ دی غیرجانبدار، قابل اعتماد تحقیقات تے رضا مند، پاݨی روکݨ دی کہیں وی کوشش دا پوری طاقت نال ولدا ݙتا ویسی، وزیر اعظم دا کاکول دی پاسنگ آئوٹ پریڈ نال خطاب

کاکول۔26اپریل(اے پی پی)وزیر اعظم محمد شہباز شریف ہر قسم دی دہشت گردی دی شدید مذمت کریندے آکھیے جو پاکستان ہک ذمہ دار ملک ہووݨ پاروں پہلگام واقعہ دی ’’کہیں وی غیر جانبدارانہ، شفاف اتے قابل اعتماد تحقیقات‘‘ اچ رلݨ کوں تیار اے ٻھل پاݨی روکݨ دی کہیں وی کوشش دا پوری طاقت نال ولدا ݙتا ویسی، امن ترجیح اے ایکون ساݙی کمزوری نا سمڄھیا ونڄے۔ اپݨے ملک دے وقار اتے سلامتی تے کوئی سمجھوتہ نہ کریسوں۔ او پاکستان ملٹری اکیڈمی دے کیڈٹس دی پاسنگ آؤٹ پریڈ نال خطاب کریندے پئے ہن۔ وزیراعظم آکھیا جو مشرقی سرحد تے بھارت پہلگام سانحہ اچ قابل بھروسہ تحقیقات یا قابل تصدیق شواہد دے بغیر استحصال اتے بے بنیاد کوڑے الزامات لگانے دی روش برقرار رکھی اے ڄیرھی ایندی دائمی الزام تراشی دی ٻئی مثال اے اتے ایکوں روکݨ ضروری اے، پاݨی پاکستان دا اہم قومی مفاد اتے ساݙی لائف لائن اے، پاݨی دی دستیابی کوں ہر قیمت اتے حالات تے محفوظ رکھیا ویسی، ڄیکر سندھ طاس معاہدے کوں زک پچائی ڳئی تاں ایندا پوری طاقت نال ولدا ݙتا ویسی، ایندے اچ کوئی ابہام کائنی۔ وزیر اعظم آکھیا جو ساݙیاں مسلح افواج کہیں وی مہم جوئی دے خلاف ملک دی  سالمیت و خودمختاری دے دفاع کیتے ہر ویلھے تیار ہین جیندا ثبوت فروری 2019 اچ بھارتی دراندازی تے ایندے پرعزم ردعمل نال ملدے، پوری قوم اپݨی افواج اتے حکومت دے نال اے اتے مادر وچن تے چپے چپے دا دفاع کیتا ویسی۔ انہاں آکھیا جو پاکستان امن و سلامتی کیتے عالمی سطح تے ذمہ دارانہ و تعمیری کردار ادا کرݨ کیتے اپݨا غیر متزلزل عزم جاری رکھسی، عالمی سطح تے تسلیم شدہ تنازعہ اقوام متحدہ دی کئی قرارداداں دے باوجود حل نئیں تھیا، کشمیریاں دی جدوجہد اچ کامیابی تئیں پاکستان کشمیریاں دے نال کھڑے، انہاں آکھیا جو افغانستان نال وی چنڳے تعلقات دی پوری کوشش اے ٻھل ساݙیاں مخلصانہ کوششاں دے باوجود افغان سرزمین توں دہشت گردی جاری اے، ایں سانڳے نائب وزیراعظم افغانستان دا دورہ وی کیتے، امید اے چنڳے نتائج نکلسن، اساں کابل نال پرامن ہمسایہ تعلقات چایندے ہیں ٻھل او تئیں اے ممکن نئیں ڄے تئیں فتنہ الخوارج پاکستان اچ بے گناہ لوکاں کوں مارݨ کیتے افغان سرزمین استعمال کریسی۔ انہاں آکھیا جو بھارت کوں اپݨیاں اقلیتاں خاص کر مسلماناں اتے سکھاں دے خلاف منظم  مہم روکݨ اتے انہاں دے حقوق دے تحفظ کیتے عالمی قوانین دے تحت پوری ذمہ داری قبول کرݨی ہوسی۔انہاںس وال کیتے جو پاکستان توںو دھ کیہڑے ملک دہشتگردی توں اتنا وݙا نقصان چاتے؟ اساں کہیں وی قسم دی دہشت گردی کوں اصلوں برداشت نہ کریسوں۔ وزیر اعظم جو معاشی اتے سفارتی محاذ تے حکومت دے اقدامات اہم سنگ میل پار کریندے پین۔ ایں توں پہلے وزیراعظم پریڈ دا معائنہ کیتے اتے بہترین کیڈٹس کوں انعامات ݙتن۔ تقریب اچ وزیر دفاع خواجہ محمد آصف، وزیر اطلاعات و نشریات عطاء اللہ تارڑ، چیف آف آرمی سٹاف جنرل سید عاصم  منیر، عسکری قیادت، سفارتی کور دے ارکان اتے کیڈٹس دے والدین وی شرکت کیتی۔