اسلام آباد۔28اپریل (اے پی پی) وفاقی وزیر صحت سید مصطفیٰ کمال آکھیا جو پاکستان ہر شہری کوں معیاری صحت دی سہولت ݙیوݨ اتے یونیورسل ہیلتھ کوریج کیتے پرامید اے، حکومت صحت دے شعبے اچ بجٹ ودھاوݨ، بنیادی مراکز صحت کوں مضبوط ٻݨاوݨ اتے قابل تدارک بیماریاں اچ ڳھٹکی کیتی کم کریندی پئی اے۔ شنگھائی تعاون تنظیم دی صحت بارے کانفرنس توں خطاب کریندیں ہوئیں انہاں آکھیا جو ایس او کانفرنس اچ شرکت انہاں کیتے اعزاز اے۔ انہاں آکھیا اساݙا مقصد دنیا کوں ہک صحت مند اتے محفوظ ڄاہ ٻݨاوݨ اچ سانجھا کردار ادا کرݨ اے۔ انہاں آکھیا جو پاکستان ہر شہری کوں معیاری صحت دی سہولت ݙیوݨ اتے یونیورسل ہیلتھ کوریج کیتے پرامید اے، حکومت صحت دے شعبے اچ بجٹ ودھاوݨ، بنیادی مراکز صحت کوں مضبوط ٻݨاوݨ اتے قابل تدارک بیماریاں اچ ڳھٹکی کیتی کم کریندی پئی اے۔ وزیر صحت ڈیجیٹل ہیلتھ دی اہمیت کوں اجاگر کریندیں ہوئیں آکھیا جو ڈیجیٹل ہیلتھ ویلھے دی لوڑھ اے۔ انہاں ڈیجیٹل تقسیم دے خاتمے، سرحد پار تعاون، اتے نیشنل ڈیجیٹل ہیلتھ فریم ورک دے تحت عوام مرکوز صحت نظام دی ترقی دا ذکرکریندیں ہوئیں آکھیا جو ایس سی او ڈیجیٹل ہیلتھ ٹاسک فورس ٻݨائی ونڄے۔انہاں نیشنل ایکشن پلان برائے صحت سلامتی (2024-28) دی تیاری اتے انٹرنیشنل ہیلتھ ریگولیشنز (IHR) تے عمل درآمد اچ پاکستان دی پیش رفت تے روشنی پاتی۔
