قومی سالمیت دے معاملے تے پوری قوم ھک مٹھ اے ، ملک کوں پیش اڄوکے چیلنجز دے تناظر اچ ساریاں سیاسی جماعتاں، ادارے تے عوام یکجہتی دا مظاہرہ کیتے،اسحاق ڈار

اسلام آباد۔29اپریل(اے پی پی) نائب وزیراعظم / وزیر خارجہ اسحاق ڈار آکھیے قومی سالمیت دے معاملے تے پوری قوم ھک مٹھ اے ، ملک کوں پیش اڄوکے چیلنجز دے تناظر اچ ساریاں سیاسی جماعتاں، ادارے تے عوام یکجہتی دا مظاہرہ کیتے،سینیٹ توں متفقہ قرارداد منظور تھیوݨ ایں ڳالھ دا واضح ثبوت اے جو پاکستان دی سالمیت تے کوئی سمجھوتہ نی کیتا ونڄ سڳدا ، سارے ارکان سینیٹ کوں مبارخ ݙینداں انہاں ھک مٹھ تھی تے ھک تکڑا سنھیا ݙتے ۔ سینیٹ اجلاس اچ ڳالھ کریندے انہاں آکھیے فیڈریشن دی نمائندگی کریندے سینیٹ آف پاکستان ھک واضح اتے متفقہ قرارداد دے ذریعے دنیا کوں ݙسائے جو قومی سالمیت دے معاملے تے قوم ھک مٹھ اے ۔اسحاق ڈارݙسائے حکومت اتے اپوزیشن دے سارے ارکان افہام و تفہیم دے ذریعے قرارداد دا مسودہ تیار کیتے، جیڑھا متفقہ طور تے منظور کیتا ڳئے ۔ انہاں آکھیے جتھاں ملکی سالمیت دا مسئلہ اے، اتھاں کہیں قسم دی تفریق کائںی تے سینیٹ یکجہتی دا مظاہرہ کیتے ۔وزیر خارجہ عالمی سطح تے کیتی ڳئی سفارتی کوششاں دا وی ذکر کریندے آکھیے اساں سعودی عرب، متحدہ عرب امارات، قطر، چین، آذربائیجان، بحرین اتے ہنگری دے وزرائے خارجہ کوں صورتحال دا ݙسائے ۔ انہاں آکھیے قطر دے وزیر اعظم نال وی ایں سلسلے اچ تفصیلی ڳالھ مہاڑ تھئی اے ۔پاکستان دا ایں واقعے نال کوئی تعلق کائنی، الحمدللہ اساں تے کوئی الزام ثابت نی تھی سڳیا ۔ انہاں آکھیے انہاں ملکاں نال جیڑھے رابطے تھئن ساݙے تعلقات انہاں نال ٻہوں چنڳے ہن ۔نائب وزیر اعظم  اسحاق ڈارآکھیے قومی سلامتی کمیٹی اچ سول و ملٹری قیادت یکجہتی دا پروگرام ݙتے تے سینیٹ متفقہ قرارداد دے ذریعے دنیا کوں سنھیا ݙتے جو پوری قوم ھک مٹھ اے۔انہاں اپوزیشن لیڈر سودھے سارے ارکان سینیٹ دا شکریہ ادا کریندے آکھیے قومی سلامتی جیھے حساس معاملے تے ساریاں سیاسی وابستگیاں ھک پاسے سٹ تے ھک تکڑا ، سانجھا موقف سامݨے آئے۔اسحاق ڈار آکھیے اساں سعودی عرب، متحدہ عرب امارات، قطر، چین، ترکی، اتے ہنگری دے وزرائے خارجہ نال رابطہ کرتے صورتحال دی تفصیل نال وضاحت کیتی۔ انہاں کوں ذاتی طور تے بریف کیتا ڳئے جو اصل حقائق کیا ہن اتے پاکستان دے خدشات کیا ہن۔وزیر خارجہ ݙسائے جو کئی ملکاں دی طرفوں خود وی انھاں نال رابطہ کیتا ڳئے ، جیڑھے ایں معاملے تے پاکستان نال ڳالھ کرݨ چاہندے ہن ۔ انہاں مزید آکھیے دفتر خارجہ اپݨے سرکاری ٹویٹر اکائونٹ دے ذریعے میڈیا اتے عوام کوں مسلسل ݙسیندا پئے تے شفاف اطلاعات پڄائیاں ویندیاں پئن ۔اسحاق ڈار خوشی دا اظہار کریندے آکھیے چین تے ترکی ایں معاملے تے پاکستان دے موقف دی بھرپور حمایت کیتی اے تے واضح سٹینڈ ڳھدے ، جیڑھا پاکستان دی سفارتی کوششاں دی کامیابی دا ثبوت اے۔انہاں آکھیے چینی وزیر خارجہ بالکل واضح آکھیے جو اساں پاکستان دے رلے ہیسے تے چینی وزارت خارجہ گزریل ݙینھ ایں حوالے نال باقاعدہ اعلامیہ وی جاری کیتے۔ انہاں مزید آکھیے ترک وزیر خارجہ وی ذاتی طور تے یقین ݙیوائے جو ترکیہ پاکستان دے رلے کھڑے ۔اسحاق ڈارآکھیے ہݨ ایجھی پالیسی نہ چلسی بلکہ سلھ دا جواب پتھر نال ݙتا ویسی ۔ انہاں آکھیے آئی ایس پی آراڄ  ثبوتاں نال انڈین دہشت گردی دے خلاف پریس کانفرنس کیتی تے پہلگام واقعے دے حوالے نال پکے ثبوت قوم دے سامݨے رکھئن ۔ انہاں انکشاف کیتے جو پہلگام واقعے دے بعد 24 اپریل کوں بھارت توں ھک خط ملئے جئیں اچ سندھ طاس معاہدہ متعلق آکھیا ڳئے جو حالات بدل چکئن ۔ اسحاق ڈار آکھیے پلوامہ دا ڈرامہ ہووے یا پہلگام دا، بھارت اڄ تئیں ثبوت پیش نی کرسڳیا تے ہݨ وی صورتحال مشکوک اے۔وزیر خارجہ چتاوݨی ݙتی جو اساکوں اندیشہ اے جو اے جنگ حالی جاری رہسی جے بھارت ساݙے پاݨی نال کہیں قسم دی چھیڑ چھاڑ کیتی، تاں اے جنگ ہوسی۔انہاں ݙوٹوک اعلان کیتے جو پاݨی ساݙی لائف لائن اے، ایں تے اساں کہیں صورت پچھوں نہ ہٹسوں۔