بھارت دی ریاستی دہشت گردی دے مکمل اتے ناقابل تردید ثبوت پیش،ہندوستان اپݨی فوج دے ذریعے پاکستان اچ تھیوݨ آلی دہشت گردی اچ براہ راست ملوث اے، ڈی جی آئی ایس پی آر

راولپنڈی۔29اپریل(اے پی پی) پاک فوج پاکستان اچ بھارتی دہشت گردی دے مکمل ثبوت دنیا دے سامݨے پیش کرݙتن ، ہندوستان اپݨی فوج دے ذریعے پاکستان اچ تھیوݨ آلی دہشت گردی اچ براہ راست ملوث اے،بھارتی فوجی افسراں میجر سندیپ ورما،صوبیدار سکھویندر، حوالدار امیت اتے ھک سپاہی  دہشت گرداں دی آن لائن تربیت اتے فنڈنگ  کریندن ،اے ڳالھ تے چیٹ پکڑ ڳھدی ڳئی اے ، گرفتار دہشت گرداں وی اعتراف کرڳھدے ۔ پاک فوج دے شعبہ تعلقات عامہ  دے ڈائریکٹر جنرل  لیفٹیننٹ جنرل احمد شریف چوہدری آکھیے پہلگام واقعے کوں 7 ݙینھ تھی ڳئن لیکن حالی تعیں الزامات دے کوئی ثبوت نی پیش کیتے ڳئے ، ست ݙینھ تھی ڳئن اتھاں صرف زبانی جمع خرچ چلدا پئے ، اساں تساڈے سامݨے بھارت دی ریاستی دہشت گردی دے مکمل ثبوت پیش کریندے پیوں ۔ڈی جی آئی ایس پی آرآکھیے بھارت خود ریاستی دہشت گردی کریندا پئے،25  اپریل کوں بھارتی تربیت یافتہ دہشت گرد عبدالمجید کوں جہلم دے نیڑے بس اݙے توں وٹھیا ڳئے ، گرفتار ملزم توں ڈھائی کلو گرام وزنی بم برآمد تھئے ، ایں دے گھر توں انڈین ساختہ ڈرون اتے ݙاہ لکھ برآمد تھئن ، ایں دہشت گرددا ہینڈلر بھارت دا ھک فوجی اے، ایں ہینڈلر دی گرفتارتھیوݨ آلے دہشت گرد نال ڳالھ مہاڑ وی سامݨے آئی اے ، دہشت گرد دے موبائل فون توں بھارت اچ تھئی ڳالھ مہاڑ وٹھی ڳئی ایں دی کمیونیکیشن بھارت اچ صوبیدار سکھویندر نال تھیندی پئی ہئی ۔ انہاں ݙسائے گرفتار بندے دی کمیونیکیشن بھارت اچ صوبیدار سکھویندر نال تھیندی پئی ہئی ایں کمیونیکشن اچ چار بھارتی آرمی افسران دی نشاندہی کیتی ڳئی اے ، انہاں بھارتی فوجی افسران اچ میجر سندیپ ورما،صوبیدار سکھویندر، حوالدار امیت اتے ھک سپاہی شامل اے، بھارتی ہینڈلر انھاں دہشت گرداں کوں آکھدا پئے پاکستان اچ شہریاں دیاں لاشاں چاہیدن، پاکستان اچ کارروائی کرو تاں جو دنیا کوں ݙسایا ونڄے جو اتھاں دہشت گردی اے، بھارتی ہینڈلرز  دہشت گرداں کوں بم بݨاوݨ دے طریقے تے مشتمل ویڈیوز بھیڄیندن ،کمیونیکیشن اچ میجر سندیپ اعتراف کیتےجو او بلوچستان توں لاہور تئیں دہشت گردی کریندے پئن ۔ ستمبر 24 کوں سکھویندر برنالہ بھمبر اچ بارودی مواد دی نشاندہی کیتی، دہشت گرد عبدالمجید برنالہ بھمبر توں بارودی مواد ڳھدا، 13 اکتوبر کوں دہشت گرد ضلع باغ اچ فوجی گاݙی تے وی  بم حملہ کیتا، حملے اچ فوج دے ترائے جوان زخمی تھئے، ایں بم حملے سانڳے دہشت گرد کوں بھارتی ہینڈلر 1لکھ 80 ہزار  روپے ݙتے۔ڈی جی آئی ایس پی آر ݙسائے 22 نومبر کوں سکھویندر بم گھنݨ سانڳے مجید کوں ہیڈ مرالہ دے نیڑے جاہ دی نشاندہی کیتی، دہشت گرد ایں جاہ توں تباہ شدہ ڈرون اتے آئی ای ڈی ڳھدی، 30 نومبر کوں عبدالمجید جلالپور جٹاں اچ آئی ای ڈی فوجی گاݙی تے لاتی جئیں توں 4 جوان زخمی تھئن ، دہشت گرد ٹاسک مکمل تھیوݨ تے 6 لکھ 56 ہزار  روپے ڳھدے ۔ڈی جی آئی ایس پی آر ݙسائے میجر سکھویندر 18 مارچ کوں کوٹلی دے نیڑے آئی ای ڈی دی لوکیشن ݙتی، 19مارچ کوں کوٹلی دے نیڑے ایں مشکوک بیگ دی سکول دے ٻالاں نشاندہی کیتی، آرمی یونٹ کوٹلی دے نیڑے مشکوک بیگ توں بم برآمد کیتا،کوٹلی اچ بم دی برآمدگی تے بھارتی میڈیا مقبوضہ کشمیر اچ 5 بم برآمد  تھیوݨ دا کوڑا پروپیگنڈا کیتا۔ 22اپریل 2025 کوں سکھویندر ندالہ دے نیڑے آئی ای ڈی دی ڈیلیوری کیتی، 23 اپریل کوں سکھویندر دہشت گرد کوں بس سٹینڈ تے بم  حملے دا ٹاسک ݙتا ۔ڈی جی آئی ایس پی آر آکھیے بھارت پاکستان اچ شہریاں اتے فوج تے حملیں سانڳے دہشت گرداں کوں بارود وی ݙیندا پئے ، اے آئی ای ڈیز ڈرون دے ذریعے بھیجی ویندی اے ، اے بھارتی دہشت گردی دا صرف ھک ثبوت اے۔