لاہور ۔ 8 مئی (اے پی پی) وزیراعلیٰ پنجاب مریم نواز شریف لاہور سودھ ملک دیاں بئیاں جہیں تے بھارتی ڈرون حملیاں دی تکڑے لفظاں اچ مذمت کیتی اے ۔ انہاں 12 جہیں تے بھارتی ڈرون ویلھے سر ڈھاوݨ تے پاک فوج کوں خراج تحسین اتے انتظامیہ، پولیس، ریسکیو سروسز اتے پاک فضائیہ دے ویلھے سر ردعمل دی تعریف کیتی ۔ وزیر اعلیٰ مریم نواز ہدایت ݙیندے ہوئیں آکھیا جو پنجاب دے مختلف شہراں اچ ڈرون حملیاں وچال زخمی شہری اتے افسراں دے بہترین علاج اچ کوئی کسر نہ چھوڑی ونڄے اتے متعلقہ علاقیاں اچ انتظامی افسراں کوں زخمیاں دے علاج دی نگرانی کیتی ونڄے ۔ انہاں آکھیا جو کم سن بالاں سودھ بے گناہ شہریاں کوں شہید کر تے بھارت ننگی جارحیت دا ارتکاب کیتا اے ، بھارت کوں بے گناہ شہریاں تے حملے دا خمیازہ بھوڳݨا پوسی اتے ہک ہک قطرے دا حساب ݙیوݨا پوسی ۔ انہاں آکھیا جو شہداء دا خون ضائع نہ ویسی ، پوری قوم پاک فوج دے افسراں اتے سپاہیاں کوں سلام پیش کریندی اے جنہاں اپݨی جان دی پرواہ کیتے بغیر پاکستان دی سلامتی کیتے دشمن کوں ناکوں چنے چبوائے ۔ انہاں آکھیا جو دنیا بھر اچ بھارتی پائلٹ نا اہلی اتے ناکامی دا استعارہ بݨ ڳئن ، بھارت دا غرور رافیل طیارے زمین تے ملبے دا ڈھیر بݨ ڳئن ، بھارت آبی ذخائر تے حملہ کر تے عالمی قنوناں دی واضح خلاف ورزی کیتی ۔ وزیر اعلیٰ مریم نواز، لاہور، گوجرانوالہ، چکوال، راولپنڈی، اٹک، بہاولپور اتے ٻئے شہراں اچ پولیس، انتظامیہ اتے بئے اداریاں کوں ہر ویلھے الرٹ رہݨ دی ہدایت کیتی اے ، انہاں ڈرون حملیاں اچ زخمیاں دی صحت یابی کیتے دعا وی کیتی ۔
