اسلام آباد۔13مئی(اے پی پی) وفاقی وزیردفاعی پیداوار رضا حیات ہراج شہداء اتے انہاں دے گھرآلیں کوں زبردست خراج عقیدت پیش کریندے آکھیے بھارت دے خلاف عظیم فتح شہیداں دی رَت نال ملی اے ، اساں دشمن کوں پنج محاذاں تے ہرائے ،بھارت ہݨ کہیں وی ایڈونچرتوں پہلے ہزارواری سوچیسی ۔او معرکہ حق دے شہداء دی قبراں تے حاضری اتے دعا دے بعد شہداء دے گھرآلیں نال ڳالھ مہاڑ کریندے پئے ہن۔ وفاقی وزیر ماہنی سیال تے کوٹ مولچند وی ڳئن۔ او شہداء دے اہلخانہ نال ملئے تے انہاں کوں خراج تحسین پیش کیتے ۔انہاں آکھیے پوری قوم انھاں دی شکرگزار اے ،شہداء ھک عظیم مقصد سانڳے آپݨی جاناں دا نذرانہ پیش کیتے ، شہداء دیاں قربانیاں ضائع نہ ویسن ، مسلح افواج دے افسراں اتے نینگراں آپݨی قربایناں نال ھک نویں تاریخ رقم کیتی اے ، پوری قوم شہداء، انھاں دے گھرآلیں تے رشتے داراں دیاں قربانیاں دی مقروض اے ۔ انہاں آکھیے عسکری قیادت،حکومت تےعوام اپݨے شہداء کوں دلوں خراج عقیدت پیش کریندن ۔وفاقی وزیر رضا حیات ہراج بھارتی جارحیت اچ شہید تھیوݨ آلے سپاہی محمد عدیل اتے شہری عبدالمالک دی قبراں تے وی حاضری ݙتی تے فاتحہ پڑھی ۔انہاں شہداء دی قبراں تے پُھل رکھئے ۔رضا حیات ہراج شہداء دے اُچے درجات سانڳے دعا منڳی۔ انہاں آکھیے پاک افواج دے بھرپور جوابی حملیں دشمن کوں شکست ݙتی ساݙے نینگراں بہادری دے جوہر ݙکھائے جنہاں کوں پوری دنیا منیے، وطن عزیز دے پاسے اُٹھݨ آلی میلی اکھ کوں پھوڑ ݙیسوں ،افواج پاکستان تے پوری قوم ملکی دفاع سانڳے ہر قربانی ݙیوݨ سانڳے ہر ویلھے تیار اے ،حکومت شہداء دے گھرآلیں دے رلے کھڑی اے ، شہداء دے خانداناں دی مکمل ݙیکھ بھال تے ہرممکن مدد کیتی ویسی۔
