نائب وزیراعظم سینیٹر اسحاق ڈار دی بیجنگ اچ چین دے وزیر خارجہ نال ملاقات، ݙوپاسہ تعاون سودھے مختلف موضوعات تے تفصیلی ڳالھ مہاڑ

بیجنگ۔21مئی (اے پی پی) نائب وزیراعظم اتے وزیر خارجہ سینیٹر محمد اسحاق ڈار بیجنگ اچ سی پی سی دی 20 ویں مرکزی کمیٹی دے سیاسی بیورو دے رکن اتے چین دے وزیر خارجہ وانگ یی نال ملاقات کیتی۔ دفتر خارجہ توں جاری بیان موجب ملاقات روایتی گرمجوشی اتے ہم آہنگی دے ماحول اچ تھیئی جیڑھی پاک چین دوستی دی عکاس اے، ݙوہیں رہنماواں جنوبی ایشیا دی اڄوکی صورتحال، ݙو پاسہ تعلقات دے مختلف پہلوواں اتے کثیر الجہتی فورمز تے تعاون سودھے مختلف موضوعات تے تفصیلی ڳالھ مہاڑ کیتی۔ نائب وزیراعظم پاکستان دی خودمختاری، علاقائی سالمیت اتے آپݨے دفاع دے حق دے تحفظ کیتے چین دی حکومت اتے عوام ولوں مسلسل حمایت دی تعریف کیتی۔ چین کیتے اوہدے بنیادی مسائل تے پاکستان دی غیر متزلزل حمایت دا اعادہ کریندیں ہوئیں انہاں ہمہ موسمی سٹریٹجک کوآپریٹو پارٹنرشپ کوں ٻیا ڳھاٹا کرݨ کیتے پاکستان دے عزم دا اعادہ کیتا جیڑھا قیادت دے تصور اتے ݙوہیں برادر ملکاں دی عوام دی خواہش تے مبنی اے۔ نائب وزیراعظم اقوام متحدہ دی سلامتی کونسل دی قرارداداں دے مطابق تنازعہ جموں تے کشمیر دے حل کوں خطے اچ دیرپا امن کیتے ناگزیر قرار ݙتا۔ نائب وزیراعظم اتے وزیر خارجہ محمد اسحاق ڈار دا بیجنگ اچ خیرمقدم کریندیں ہوئیں وزیر خارجہ وانگ یی ایں ڳالھ تے زور ݙیتا جو چین پاکستان کوں ہک آہنی دوست اتے ہمہ موسمی اسٹریٹجک پارٹنر دے طور تے ݙیکھدے۔ انہاں ݙو پاسہ تعلقات کوں تعاون اتے اشتراک دیاں نویاں بلندیاں تئیں پڄاوݨ کیتے چین دی خواہش دا اظہار کیتا۔ آپݨی خودمختاری اتے علاقائی سالمیت دے تحفظ اچ پاکستان دے پرعزم موقف کوں سراہندے ہوئیں انہاں ایں ڳالھ دی تصدیق کیتی جو چین علاقائی امن، ترقی اتے استحکام دے ودھارے کیتے پاکستان دے نال رَل تے کم جاری رکھیسی۔ وزیر خارجہ وانگ یی ایں ڳالھ دا وی اعادہ کیتا جو آہنی بھرا دی حیثیت نال چین ہمیشہ پاکستان دی خودمختاری، سالمیت اتے ترقی دے راہ دی حمایت کریسی۔ فریقین پاک چین تعلقات دیاں مختلف جہتاں دا جائزہ گھیدا اتے ݙوپاسہ تعلقات دی مثبت رفتار تے اطمینان کیتا۔ انہاں تجارت، سرمایہ کاری، آئی سی ٹی، زراعت، صنعت کاری اتے ٻئے اہم شعباں اچ تعاون کوں ٻیا ڳھاٹا کرݨ دا عزم کیتا۔ ݙوہیں پاسے علاقائی رابطیاں اتے اقتصادی ترقی کوں ودھاوݨ کیتے سی پیک دی اہمیت دا ذکر کیتا اتے سی پیک فیز II دی مسلسل پیش رفت تے اطمینان دا اظہار کیتا۔ انہاں کامیابی دے تعاون کیتے خاص طور تے سی پیک منصوبیاں اچ تریجھا فریق دی سانجھ دے نویں راستے نال ابھرݨ آلے موقعیاں تے وی زور ݙتا۔ ݙوہیں رہنماواں خطے اتے اوندے توں ٻاہر امن، سلامتی اتے پائیدار ترقی دے آپݨے مشترکہ اہداف کوں اڳوں ودھاوݨ کیتے کثیرالجہتی فورمز سودھے ساریاں سطحاں تے ڳہرا رابطے اتے ہم آہنگی کوں برقرار رکھݨ تے اتفاق کیتا۔