بھارت دی اڄوکی جارحیت دے بعد پہلی واری کشمیر دا معاملہ عالمی سطح تے چاتا ڳئے، توجہ ہٹاوݨ کیتے خضدار اچ حملہ کیتا ڳئے، قیصر احمد شیخ

اسلام آباد۔21 مئی(اے پی پی)وفاقی وزیر سرمایہ کاری قیصر احمد شیخ آکھیے جو بھارت دی اڄوکی جارحیت دے بعد پہلی واری کشمیر دا معاملہ عالمی سطح تے اجاگر تھی ڳئے، جیں توں توجہ ہٹاوݨ کیتے خضدار اچ حملہ کیتا ڳئے۔ قومی اسمبلی اچ خضدار اچ دہشت گردی دے واقعے تے بحث اچ حصہ گھندے ہوئیں انہاں آکھیے جو خضدار واقعہ قابل مذمت اے۔ جݙاں بھارت ہر ڳیا تاں اوں محسوس کیتا جو اوں کوں حزیمت دا سامݨا کرݨا پئےا تاں اوں خضدار اچ حملہ کر ݙتا۔انہاں فیلڈ مارشل عاصم منیر اتے ائیر چیف کوں مبارخ ݙتی  جنہاں بھارتی جارحیت دے دوران بہترین کارکردگی دا مظاہرہ کیتا۔ انہاں آکھیے جو پاکستان دی ہر چُنڈ اچ آرمی چیف اتے مسلح افواج نال اظہار یکجہتی کرݨا چاہیدے۔ انہاں آکھیے جو بھارت پاکستان دی معیشت کوں ضیان پڄاوݨ چاہندے دنیا کوں اے پتہ لڳ ڳئے جو چین دے خلاف بھارت کوں کھڑا کرݨ دیاں انہاں دیاں کوششاں کامیاب نہ تھیسن۔ انہاں آکھیے جو چین، ترکیہ، ایران اتے آذربائیجان وی ساݙی حمایت کیتی ، ہݨ بنگلہ دیش وی بھارت دے خلاف اے۔ انہاں زور ݙتے جو پہلی واری کشمیر دا معاملہ عالمی سطح تے اجاگر تھی ڳئے جئیں توں توجہ ہٹاوݨ سانڳے خضدار اچ حملہ کیتا ڳئے۔ بھارت کوں اپݨیاں انہاں مذموم کوششاں اچ کامیابی نہ ملسی۔ انہاں آکھیے جو مسئلہ کشمیر سارے مسئلیں دا منڈھ اے تے امریکا کوں ایں مسئلے دے حل کیتے اپݨا کردار ادا کرݨا ہوسی۔