وفاقی وزیر خزانہ نال نیدرلینڈز دی سفیر دی ملاقات

اسلام آباد۔21 مئی(اے پی پی) وفاقی وزیر خزانہ و محصولات سینیٹر محمد اورنگزیب برآمدات تے مبنی نمو دے حوالے نال حکومت دے عزم دا اعادہ کریندے آکھیے جو نجی شعبہ معیشت دی ترقی دا اصل محرک اے، کلیدی معاشی اشاریں نال معیشت دی صحیح پاسے دی عکاسی تھیندی پئی اے۔ انہاں اے ڳالھ اتھاں نیدرلینڈز دی سفیر ہینی ڈی فریس نال وزارت خزانہ اچ ملاقات اچ کیتی۔ ملاقات دے دوران ݙوہیں فریقاں سانجھی دلچسپی دے امور اتے ݙو طرفہ معاشی تعاون مزید تکڑا بݨاوݨ دے امکانات تے ڳالھ مہاڑ کیتی۔ وزیر خزانہ پاکستان دی موجودہ معاشی صورتحال اتے حکومتی اصلاحات دے ایجنڈے دا سفیر کوں ݙسائے تے خاص طور تے معیشت دے اہم شعبیاں تے روشنی پاتی۔ انہاں پائیدار، پیداواری اتے برآمدات تے مبنی ترقی کیتے حکومت دے عزم دا اظہار کیتا اتے ایں ڳالھ تے زور ݙتا جو نجی شعبہ معیشت دی ترقی دا اصل محرک اے۔ انہاں پاکستان اچ ترقی اتے صلاحیت ودھاوݨ دے مختلف منصوبیاں اچ نیدرلینڈز دی تکنیکی اتے مالی مدد دی تعریف کیتی۔ سینیٹر اورنگزیب پاکستان اچ نیدرلینڈز دیاں کمپنیاں دی دلچسپی اتے سرمایہ کاری دا خیرمقدم کیتا اتے غیر ملکی سرمایہ کاری کیتے سوکھ پیدا کرݨ اتے بہتر کاروباری ماحول ݙیوݨ دے حکومتی عزم دا اعادہ کیتے۔ سفیر ہینی ڈی فریس حکومت دی معاشی اصلاحات اتے برآمدات تے مبنی پالیسیاں دی تعریف کیتی اتے پاکستان دی معاشی ترقی کیتے نیدرلینڈز دی حمایت دا اعادہ کیتے۔ انہاں مختلف شعبیاں اچ تعاون ودھاوݨ دی خواہش دا اظہار کیتے۔ فریقاں پاکستان اتے نیدرلینڈز وچال تعلقات کوں مزید تکڑا بݨاوݨ اتے سانجھی دلچسپی دے شعبیں اچ تعاون جاری رکھݨ دے عزم دا اظہار کیتے۔