ملتان۔23 مئی (اے پی پی) ایڈیشنل چیف سیکرٹری جنوبی پنجاب فواد ہاشم ربانی آکھیے جو جنوبی پنجاب دی تکھّی ترقی کیتے ہر شعبے کوں ڈیجیٹائز کیتا ویندا پئے کیوں جو موجودہ دور اچ تکھے ترقی کیتے ہر شعبے اچ آئی ٹی اَتے اے آئی سسٹم دا اطلاق ضروری اے۔ اے ڳالھ انہاں جنوبی پنجاب سیکرٹریٹ دے دورے تے آئے نیشنل انسٹی ٹیوٹ آف پبلک ایڈمنسٹریشن (این آئی پی اے) اسلام آباد اچ زیر تربیت 43 ویں مڈکیریئر کورس دے افسراں نال خطاب کریندے ہوئیں کیتی۔ ایڈیشنل چیف سیکرٹری آکھیے جو جنوبی پنجاب سیکرٹریٹ صوبے دا پہلا ادارہ اے جتھاں سو فیصد الیکٹرانک فائلنگ سسٹم لانچ کیتا ڳئے ۔ ایندے علاوہ شفافیت قائم رکھݨ کیتے ای پروکیورمنٹ سسٹم اپنایا ڳئے اَتے سیکرٹریٹ دے سارے محکمیں دا ریکارڈ ڈیجیٹائز کرݙتا ڳئے کیوں جو سرکاری محکمیں اچ گڈ گورنس، بہتر سروس ڈیلیوری اَتے ریکارڈ اپ ڈیٹ رکھݨ کیتے آئی ٹی دا استعمال اَتے ڈیجیٹائزیشن ٻہوں ضروری اے۔ انہاں آکھیے جو محکمہ زراعت اچ کراپ رپورٹنگ کیتے آئی ٹی اَتے اے آئی دی مدد ڳھدی ویندی پئی اے اَتے جنوبی پنجاب اچ موجود جنگلات دی ڈیجیٹل میپنگ کیتی ویندی پئی اے۔ انہاں آکھیے ایں خطے اچ آئی ٹی پارک دے قیام کیتے کوششاں جاری ھن۔ فواد ہاشم ربانی آکھیے جو شرح خواندگی اچ ودھارے کیتے ”کوئی ٻال سکول توں ٻاہر کائناں رہسی“ مہم جاری اے۔ سکول ایجوکیشن ڈیپارٹمنٹ قابل فخرمنصوبے مکمل کیتن جنہاں اچ سکولمپکس گیمز اَتے ٹرانس جینڈر سکولاں دے قیام دے اقدامات شامل ھن۔ انہاں افسراں کوں ماحولیاتی تبدیلی نال نبِݨݨ دے حوالے نال اقدامات دا ݙسایا ۔ ایڈیشنل سیکرٹری علی عاطف بٹر جنوبی پنجاب تےبریفنگ ݙتی۔ ایں موقع تے ڈائریکٹنگ سٹاف این آئی پی اے ڈاکٹر فائزہ عروج وی موجود ہن
