اسلام آباد۔ 8 جون (اے پی پی)اقتصادی سروے 25-2024 (کل) سوموار 9 جون کوں پیش کیتا ویسی۔ پاکستان دا اقتصادی سروے برائے مالی سال 25-2024 ہک اہم پری بجٹ دستاویز اے جیڑھا قومی معیشت دے بارے حکومت دے جائزے دا خاکہ پیش کریندے، اکنامک سروے سوموار 9 جون دی سہ پہر کوں باضابطہ طور تے جاری کیتا ویسی۔ وزارتِ خزانہ ولوں جاری پریس ریلیز دے مطابق وفاقی وزیرِ خزانہ اتے محصولات سینیٹر محمد اورنگزیب اقتصادی جائزہ پیش کریسن۔ اقتصادی سروے سالانہ وفاقی بجٹ توں پہلے جاری تھیوݨ والی ہک اہم دستاویز ہے جیڑہی ختم تھیوݨ آلے مالی سال دے دوران ملک دی سماجی و اقتصادی کارکردگی دے بارے اچ تفصیلی جائزہ پیش کریندی اے۔ اکنامک سروے زراعت، مینوفیکچرنگ، صنعت، خدمات، توانائی، انفارمیشن ٹیکنالوجی اتے ٹیلی کمیونیکیشن، کیپٹل مارکیٹ، صحت، تعلیم، ٹرانسپورٹ اتے مواصلات سمیت بئے وݙے شعبیاں اچ رجحانات، کامیابیاں اتے چیلنجاں کوں نمایاں کریندے۔ سروے سماجی تحفظ دے پروگراماں، ماحولیاتی پائیداری اتے بنیادی ڈھانچے اچ تھیوݨ والی پیشرفت تے روشنی پاویسی۔ اے دستاویز اہم اقتصادی اشاریاں جیݙاں جو مہنگائی، تجارت اتے ادائیگیاں دے توازن، قرضہ جات، آبادی اچ ودھارا، روزگار دی سطح اتے موسمیاتی تبدیلی دے اثرات دے حوالے نال تازہ ترین اعداد و شمار وی پیش کریسی۔ اقتصادی اشاریاں دے جامع اعداد و شمار دے تحت اقتصادی سروے دا مقصد نویں مالی سال دے آغاز اچ عوامی بحث اتے پالیسی دی منصوبہ بندی توں واقف کرݨ وی ہے۔ اینول پلان کوآرڈینیشن کمیٹی (اے پی سی سی) دے مطابق، جیں دیاں سفارشات دی قومی اقتصادی کونسل (این ای سی) توثیق کیتی ہئی، مالی سال 25-2024 کیتے پاکستان دی مجموعی ملکی پیداوار (جی ڈی پی) دی شرح نمو 2.7 فیصد ریکارڈ کیتی ڳئی اے۔ آوݨ آلے مالی سال کیتے جی ڈی پی دی شرح نمو دا ہدف 4.2 فیصد مقرر کیتا ڳئے۔ این ای سی دے مطابق جولائی 2024 توں اپریل 2025 تئیں ترسیلات زر اچ 30.9 فیصد دا وݙا ودھارا ریکارڈ کیتا ڳئے اتے پہلی واری ایں عرصے دے دوران کرنٹ اکاؤنٹ بیلنس وی سرپلس اچ رہیا۔ سروے اچ مالیاتی اشاریاں اچ بہتری کوں وی اجاگر کیتا ویسی، بشمول مالیاتی خسارے کوں جی ڈی پی دے 2.6 فیصد تئیں گھٹ کرݨ وغیرہ۔ بنیادی توازن اچ جی ڈی پی دا 3 فیصد سرپلس ریکارڈ کیتا ڳئے جو ودھ نظم و ضبط آلے مالیاتی نقطہ نظر دی عکاسی کریندے۔ بہتر اقتصادی بنیادی اصولاں اتے فعال مانیٹری پالیسی اقدامات دی وجہ توں (پالیسی) سود دی شرح بتدریج 11 فیصد تئیں گھٹ کر ݙتی ڳئی اے۔ ایں دوران، نجی شعبے کیتے قرضیاں اچ نمایاں ودھارا تھئے۔ جولائی 2024 اتے مئی 2025 دے درمیان 681 ارب روپے دے قرضہ جات جاری کیتے ڳئن۔ این ای سی ایں ڳالھ تے زور ݙتے جو معاشی استحکام دے حالیہ آثار وفاقی اتے صوبائی حکومتاں دیاں مربوط کوششاں دا نتیجہ ہن۔ مزید آکھیا ڳئے جو ملک ہݨ اقتصادی بحالی اتے ترقی دی راہ تے گامزن اے۔ زراعت دے شعبے قومی معیشت کوں مضبوط بݨاوݨ اتے اقتصادی توسیع دی مدد اچ خاص طور تے اہم کردار ادا کیتا۔ آوݨ آلے سالاں اچ زرعی پیداوار اچ مستقل اتے پائیدار ودھارے کوں یقینی بݨاوݨ کیتے ہک جامع حکمت عملی مرتب کیتی ویندی پئی اے۔ ترقیاتی اخراجات دے لحاظ نال 25-2024 دے سالانہ قومی ترقیاتی پروگرام (اے این ڈی پی) کیتے 3,483 ارب روپے دی منظوری ݙتی ڳئی جیں اچ وفاقی ترقیاتی اقدامات کیتے 1100 ارب روپے مختص کیتے ڳئن، صوبائی حکومتاں اپݨے اپݨے منصوبیاں کیتے 2383 ارب روپے استعمال کیتے ہن۔ توقع ے جو اقتصادی سروے 25-2024 آوݨ آلے وفاقی بجٹ کیتے ہک ٹھوس بنیاد ݙیوݨ دے نال نال پاکستان دے وسیع تر اقتصادی ایجنڈے کیتے وی رہنمائی کریسی کیوں جو ملک مالیاتی و میکرو اکنامک استحکام اتے جامع ترقی دی منزل دے حصول کیتے کوششاں جاری رکھے ہوئین۔
