اسلام آباد۔9 جون(اے پی پی)وفاقی حکومت ایں مالی سال 25-2024 دا اقتصادی سروے جاری کر ݙتے۔ اڄوکے مالی سال اچ مجموعی قومی پیداوار (جی ڈی پی) اچ 2.7 فیصد ودھارا تھئے۔ جی ڈی پی دا حجم پہلی واری 411 ارب ڈالر توں تجاوز کر ڳئے، فی کس سالانہ آمدنی 1824 ڈالر رہی، افراط زر دی شرح 0.3 فیصد تئیں گھٹ ڳئی اے۔ برآمدات اچ 6.8 فیصد جڈاں جو ترسیلات زر دے محصولاں اچ 30.9 فیصد اتے ایف بی آر دی ٹیکس وصولیاں اچ 25.9 فیصد ودھارا تھئے۔ مالیاتی خسارہ 2.6 فیصد تئیں گھٹ ڳیا جڈاں جو کے ایس ای 100 انڈیکس اچ 52.6 فیصد دی شرح نمو ریکارڈ کیتی ڳئی اے۔ سنوار کوں جاری اقتصادی سروے دے مطابق، گزریے مالی سال زرمبادلہ دے قومی ذخائر اچ 5 ارب ڈالر دا ݙو ڳنا ودھارا تھئے جڈاں جو مالی سال 2023 اچ زرمبادلہ دے ذخائر 5.4 ارب ڈالر ہن۔ مالیات دے موثر نظام اتے اخراجات تے کنٹرول نال گزریے 20 سال اچ پہلی واری پرائمری بیلنس سرپلس رہے جیںدے نال جی ڈی پی دے مقابلے اچ قرضیاں دی شرح اچ خاطر خواہ کمی تھئی۔ زرعی شعبے دی ترقی کیتے زرعی مداخل، تصدیق شدہ بیجاں، مشینری دی خریداری اتے فارم منیجمنٹ کیتے ایگریکلچر کریڈٹ سکیم متعارف کرائی ڳئی جیںدے نال خاطر خواہ نتائج ملین۔ خصوصی سرمایہ کاری سہولت کونسل (ایس آئی ایف سی) دے اقدامات نال توانائی، زراعت، کان کنی، معدنیات، آئی ٹی اتے دفاع دے شعبیاں اچ پائیدار ترقی کیتے کئی مواقع پیدا تھئن۔ ایس آئی ایف سی دے تحت ملک اچ مجموعی کاروبار دے ماحول دی بہتری اتے سرمایہ کاری کوں متوجہ کرݨ کیتے جامع اقدامات کیتے ڳئن۔ گھٹ آمدنی آلے طبقیاں کوں ریلیف فراہم کرݨ کیتے بے نظیر انکم سپورٹ پروگرام اچ 27 فیصد ودھارا کیتا ڳیا۔ وزیراعظم یوتھ سکلز ڈویلپمنٹ پروگرام دے تحت 16 ہزار توں ودھ افراد کوں آئی ٹی اتے مہمان نوازی دے شعبے اچ 5 ہزار نوجواناں کوں عالمی مستند اداریاں توں تربیت ݙتی کیتی ڳئی۔ اقتصادی سروے دے مطابق، اڄوکے مالی سال اچ جی ڈی پی دی شرح نمو 2.7 فیصد رہی اے جیںدے اچ صنعتی شعبے دی 4.8 فیصد شرح نمو دا اہم کردار اے۔ واضح رہوے جو اڄوکے مالی سال کیتے صنعتی شعبے دی نمو دا ہدف 4.4 فیصد مقرر کیتا ڳیا ہا جڈاں جو گزریے سال صنعتی شعبے دی شرح نمو منفی 1.4 فیصد رہی ہئی۔ اڄوکے مالی سال اچ جی ڈی پی دا حجم پہلی واری 411 ارب ڈالر تئیں پڄ ڳئے جڈاں جو گزریے سال اے حجم 372 ارب ڈالر ہا۔ ایویں مجموعی فی کس سالانہ آمدنی اچ وی 162 ارب ڈالر دا ودھارا تھئے اتے فی کس آمدن 1824 ڈالر تئیں پڄ چکی اے۔ اپریل 2024 دے دوران افراط زر دی شرح 17.3 فیصد ہئی جیڑھی اپریل 2025 اچ 0.3 فیصد تئیں گھٹ ڳئی۔ کرنٹ اکاؤنٹ خسارہ وی جولائی 2024 توں اپریل 2025 دے دوران 1.9 ارب ڈالر سرپلس رہیا ڄڈاں جو گزریے مالی سال دے ایں عرصہ اچ ملک کوں کرنٹ اکاؤنٹ اچ 1.34 ارب ڈالر خسارے دا سامݨا ہا۔ جاری مالی سال برآمدات اچ 6.8 فیصد ودھارا تھیا اتے برآمدات دی مالیت 27.3 فیصد تئیں ودھ ڳئی جڈاں جو آئی ٹی دے شعبے دی برآمدات اچ 21 فیصد توں ودھ دی ودھوتری ریکارڈ کیتی ڳئی اے۔ سمندر پار مقیم پاکستانیاں ولوں بھیجی ڳئی ترسیلات زر اچ 30.9 فیصد دا نمایاں ودھارا تھیا۔ اقتصادی سروے رپورٹ دے مطابق، رواں مالی سال دے پہلے 10 مہینیاں اچ مجموعی غیر ملکی سرمایہ کاری 16.5 فیصد ودھارے نال 1209.4 ملین ڈالر تئیں ودھی اے۔ سرمایہ کاراں دے اعتماد اچ ودھارے دے نتیجے اچ جاری مالی سال اچ کے ایس ای 100 انڈیکس اچ 52.6 فیصد ودھارا تھیا۔ ایویں ٹیکس محصولاں اچ 25.9 فیصد دی شرح نمو نال محصولاں دا حجم 8126 ارب ڈالر دے مقابلے اچ جولائی 2024 توں مئی 2025 دے دوران 10 ہزار 234 ارب ڈالر تئیں ودھ ڳیا۔ جاری مالی سال دے دوران جی ڈی پی دے مقابلے اچ مالیاتی خسارے دی شرح گزریے سال دی 3.7 فیصد دے مقابلے اچ 2.6 فیصد تئیں گھٹ ڳئی۔ اکنامک سروے دے مطابق، بنکنگ سیکٹر دے اثاثہ جات اچ 15.8 فیصد دا ودھارا ریکارڈ کیتا ڳئے اتے اثاثیاں دی مالیت دسمبر 2024 مکݨ تے 53.7 ٹریلین روپے تئیں پڄ ڳئی۔ آئی ایم ایف دا ای ایف ایف پروگرام پاکستان دی معیشت دے استحکام دا مظہر اے۔
