لاہور۔ 16 جون (اے پی پی) پنجاب حکومت سنوار کوں آندے مالی سال 2025-26 سانگے 5335 ارب روپے دا ٹیکس فری بجٹ پیش کر ݙتے۔ صوبائی وزیر خزانہ مجتبیٰ شجاع الرحمٰن پنجاب اسمبلی اچ بجٹ پیش کیتا۔ آندے مالی سال 2025-26 سانگے ترقیاتی بجٹ دا تخمینہ 1240 ارب روپے رکھا ڳئے جو گزریل مالی سال دے مقابلے اچ 47.2 فیصد ودھ اے اتے ایں کوں صوبے دی تاریخ دا سب توں وݙا ترقیاتی بجٹ قرار ݙتا ویندا پئے، ٹیکس ریونیو دی مد اچ وصولیاں دا ہدف 524.7 ارب روپے اتے نان ٹیکس ریونیو وصولیاں دی مد اچ 303.4 ارب روپے مقرر کیتا ڳئے۔ وفاق ولوں پنجاب دا حصہ 4062.2 ارب روپے رکھیا ڳئے۔ آندے مالی سال دے بجٹ اچ جاری اخراجات تے 2706.5 ارب روپے خرچ تھیسن، جڈانجو کیپٹل اخراجات 590.23 ارب روپے، ہدف شدہ سبسڈیز تے 72.27 ارب روپے خرچ تھیسن۔ آندے مالی سال سانگے 679.8 ارب روپے جاری اتے سروسز فراہمی سانگے مختص کیتے ڳئن، ایف بی آر دی طرفوں پنجاب کوں 4062.2 ارب روپے ملݨے۔ وزیر خزانہ آکھیا جو صوبائی محصولات دا تخمینہ 828.1، جاری اخراجات دا تخمینہ 2706.5 ارب روپے، کیپٹل اخراجات دی مد اچ 590.23 ارب روپے رکھے ڳئن۔وزیر خزانہ آکھیا جو آندے مالی سال سانگے پنجاب ریونیو اتھارٹی ولوں وصولیاں دا ہدف 340 ارب رکھیا ڳئے، سبسڈیز دی مد اچ 72.27 روپے رکھے ڳئن، جڈانجو تعلیم دے شعبے سانگے 811.8 ارب روپے، صحت سانگے مجموعی طور تے 630.5 ارب روپے، لوکل گورنمنٹ سانگے 411.1 ارب روپے، تعمیرات سانگے 335.5 ارب روپے، تحفظ عامہ اتے پولیس سانگے 299.3 ارب روپے، زراعت سانگے 129.8 ارب روپے رکھے ڳئن۔ جاری خدمات دے شعبے دے حوالے نال وزیر خزانہ ݙسایا جو پی ایف سی سانگے گزریل مالی سال 857.4 ارب روپے مختص کیتے ڳئے ہن جو ودھا تے 934.2 ارب روپے کر ݙتے ڳئن، ایویں خدمات دی فراہمی تے گزریل مالی سال 722 ارب روپے خرچ کیتے ڳئے ہن جیں اچ وادھا کر تے آندے مالی سال سانگے ایں دا حجم 679.8 ارب روپے کر ݙتا ڳیا اے۔ انہاں آکھیا جو تنخواہواں دی مد اچ گزریل مالی سال 603 ارب روپے رکھے ڳئے ہن جو ایں مالی سال 630.33 ارب روپے رکھے ڳئن، ایویں پنشن دی مد اچ گزریل مالی سال دے دوران 451.4 ارب روپے مختص کیتے ڳئے ہن جڈانجو آندے مالی سال سانگے ایں کوں ودھا تے 462.2 ارب روپے کر ݙتا ڳئے۔صوبائی وزیر خزانہ آکھیا جو صوبائی محصولات جیں اچ ٹیکس اتے نان ٹیکس ریونیو شامل اے انہاں اچ پنجاب ریونیو اتھارٹی ولوں 340 ارب روپے، توانائی اتے مواصلات، انرجی و ٹرانسپورٹ دی مد اچ 9.7 ارب روپے، بورڈ آف ریونیو دی طرفوں 105 ارب روپے، ایکسائز اینڈ ٹیکسیشن دی مد اچ 70 ارب روپے، نان ٹیکس دی مد اچ 303.445 ارب روپے ملݨے جنہاں دا کل تخمینہ 828.145 ارب روپے ٻݨدے۔ وزیر خزانہ آکھیا جو آندے مالی سال دے بجٹ اچ حکومت پنجاب زراعت تے سبسڈی سانگے 22 ارب روپے، ٹرانسپورٹ سبسڈی سانگے 40 ارب روپے، مفت ادویات دی مد اچ 79.5 ارب روپے اتے رمضان پیکیج دی مد اچ 35 ارب روپے دی سبسڈی ݙیوݨ دا اعلان کیتا اے۔ انہاں آکھیا جو آندے مالی سال دے دوران سرکاری ملازماں دی تنخواہواں اچ 10 فیصد اتے پنشن اچ 5 فیصد وادھا تجویز کیتا ڳیا اے۔وزیر خزانہ آکھیا جو حکومت پنجاب آندے مالی سال دے بجٹ اچ آپݨی چھت آپݨا گھر پروگرام سانگے 150 ارب روپے مختص کیتے ہن جڈانجو سالڈ ویسٹ مینجمنٹ گرانٹ دے تحت وزیر اعلیٰ پنجاب دے وژن دے تحت لوکل گورنمنٹ سانگے 150 ارب مختص کیتے ڳئن اتے 25 ارب روپے دی وݙی لاگت نال وزیر اعلیٰ پنجاب ڈویلپمنٹ پروگرام متعارف کروایا ویندا پئے۔ صوبائی وزیر خزانہ آکھیا جو اساݙی حکومت دا سیاسی وژن ہک ایجھے پنجاب دی تشکیل اے جتھاں ہر شہری کوں صحت، تعلیم، روزگار اتے تحفظ میسر ہووے، جتھاں ترقی صرف وݙے شہراں تئیں محدود نہ ہووے بلکہ دیہی اتے پسماندہ علاقیاں تئیں وی ہکو جئی پڄے۔ اللہ تعالیٰ دے فضل و کرم نال اساں ہک ایجھے نظام حکومت دی بنیاد رکھی اے جو معاشرے دے سارے طبقیاں کوں براہ راست ریلیف مہیا کریندا پئے۔ انہاں اچ نوجوان طلباء، کسان، صنعت کار، اقلیتیں، خصوصی افراد، ہنر مند ݙھیان اتے ٻال، مزدور، مریض وی شامل ہن۔ ایہی وژن آندے مالی سال دے بجٹ دی تشکیل اچ اساݙے سانگے مشعل راہ بنڑیا جیں دے ذریعے اساں وسائل دی منصفانہ تقسیم، غربت دے خاتمے اتے روزگار دے ہکو جئے مواقع دی فراہمی کوں آپنڑیں بجٹ دی حکمت عملی دا مرکز ٻݨائے۔مجتبیٰ شجاع الرحمٰن آکھیا جو دانشمندانہ معاشی حکمت عملی دے تحت صوبائی سطح تے کیتی ڳئی مربوط کاوشاں دے نتیجے اچ گزریل ہک سال دے دوران ملکی جی ڈی پی دی شرح نمو اچ وادھا تھییا، جو ہݨ 27 فیصد تئیں پڄ ڳئی اے۔ مہنگائی دی شرح 4.7 فیصد دے نال پچھلیاں کئی دہائیاں دی گھٹ ترین سطح تے آ ڳئی اے، جڈانجو شرح سود 22 فیصد توں گھٹ تھی تے 11 فیصد تھی ڳئی اے۔ انہاں پالیسی اقدامات دے نتیجے اچ ترسیلات زر ودھ تے 31.2 ارب ڈالر تھئی ڳئن جو پچھلے سال دی نسبت 31 فیصد ودھ ہن۔ کرنٹ اکاؤنٹ خسارہ 1.9 ارب ڈالر دے سرپلس اچ بدل چکیا اے اتے زرمبادلہ دے ذخائر ودھ تے 16.6 ارب ڈالر تئیں پڄ ڳئے ہن جو مستحکم تھیندی ملکی معیشت دا منہ بولیندا ثبوت اے۔
