تہران۔ 18 جون (اے پی پی) ایران دی پاسدارانِ انقلاب بدھ کوں اسرائیل تے حملے وچ پہلی واری ہائپر سونک میزائل فتح ون استعمال کرݨ دا دعویٰ کیتا اے۔ اے ایف پی دے مطابق ایران دے سرکاری ٹیلی ویژن پریس ٹی وی تے نشر کیتے ڳئے ہک بیان وچ پاسداران انقلاب دے ہک کمانڈر آکھیا اسرائیل دے خلاف جاری آپریشن وعدہ صادق سوم دی یارھویں لہر وچ فتح ون میزائل استعمال کیتے ڳئے۔ انہاں دعویٰ کیتا جو ایرانی افواج مقبوضہ فلسطینی علاقیاں دی فضاواں تے مکمل کنٹرول حاصل کر گھدے۔ بی بی سی دے مطابق ایں حملے دے بعد اسرائیل وچ فضائی حملے دے سائرن دیاں آوازاں سݨیاں گئیاں۔ اسرائیلی فوج ایران ولوں حملے دا خبردار کریندیں ہوئیں آکھیا جو ملک دی فضائی حدیں وچ دراندازی دی وجہ توں شمالی اسرائیل وچ سائرن وجائے گئے۔ فوج سوشل میڈیا پلیٹ فارم ایکس تے انہاں علاقیاں دا نقشہ وی شائع کیتا جتھاں ایرانی میزائل حملے دے بعد خطرے دے سائرن وجائے گئے۔ پریس ٹی وی دی رپورٹ دے مطابق پاسداران انقلاب آپریشن دے تازہ ترین مرحلے کوں “ٹرننگ پوائنٹ” قرار ݙیندے ہوئیں آکھیا جو الفتح میزائل دا داغݨ اسرائیل دے دفاعی نظام کیتے اختتام دا آغاز اے۔ ایں میزائل دے داغے ونجݨ توں پہلے ایرانی پاسداران انقلاب تل ابیب دے رہائشیاں کیتے انخلا دا الرٹ جاری کیتا ہا جئیں وچ اسرائیلی شہر تے وݙے حملے دی وارننگ ݙتی گئی ہئی۔ اسرائیلی فوج گزریل کجھ گھنٹیاں وچ میزائل حملے دی وارننگ جاری کریندیں ہوئیں ملک دی فضائی حددیں وچ داخل تھیوݨ آلے میزائلاں کوں روکݨ دی کوشش کیتی جئیں دے بعد انہاں شہریاں کوں مطلع کیتا جو او محفوظ پناہ گاہواں توں نکل سگدن۔ رپورٹ دے مطابق اسرائیل آپݨے تازہ حملیاں وچ ایران دے دارالحکومت دے نیڑے خوجیر میزائل دی تیاری کرݨ آلیاں تنصیبات کوں نشانہ ٻݨیندا پئے۔ اے تنصیبات ایران دے بیلسٹک میزائل متعلق بنیادی ڈھانچے کیتے اہم سمجھیاں ویندیاں ہن اتے اسرائیل گزریل سال اکتوبر وچ وی ایران تے آپݨے حملیاں وچ انہاں کوں نشانہ ٻݨایاہا۔ تہران دے علاقے حکیمیہ وچ زوردار دھماکیاں دیاں کئی خبراں ملدیاں پیاں ہن جنہاں دی تصدیق ایران دی سپریم نیشنل سکیورٹی کونسل وی کیتی اے۔ پاسداران انقلاب نال منسلک امام حسین یونیورسٹی ممکنہ طور تے ایں حملے دا نشانہ ہئی۔ واضح رہے جو ہائپر سونک توں مراد او ہتھیار ہن جنہاں دی رفتار عام طور تے آواز دی رفتار توں 5 توں 25 گنا تئیں ہوندی اے۔ ایران پہلی واری فتح میزائل کوں بیلسٹک اتے کروز ڈوہیں زمریاں وچ ہائپر سونک میزائل دے طور تے متعارف کرایا ہا۔ ایں توں پہلے اکتوبر 2024 وچ وی ایران ولوں اسرائیل دی طرف درجنوں الفتح-1 میزائل داغے ڳئے ہن۔ الفتح میزائل کوں پہلی واری 2023 وچ منظر عام تے گھن آیا گیا ہا۔ الفتح سیریز دے ہائپر سونک میزائل دی رینج 1400 کلومیٹر اے اتے آئی آر جی سی دعویٰ کیتا اے جو او میزائل کوں تباہ کرݨ آلے سارے دفاعی نظاماں کوں چکمہ ݙے تے انہاں کوں تباہ کرݨ دی صلاحیت رکھیندے۔ الفتح ٹھوس ایندھن دے میزائلاں دی ہک نسل اے جئیں دی رفتار ہدف کوں نشانہ ٻݨاوݨ توں پہلے 13 توں 15 میک تئیں اے۔ میک 15 دا مطلب پنج کلومیٹر فی سیکنڈ دی رفتار اے۔ پاسدارانِ انقلاب ایرو سپیس آرگنائزیشن دے کمانڈر امیر علی حاجی زادہ الفتح میزائل دی نقاب کشائی دی تقریب وچ آکھیا ہا جو اے میزائل تیز رفتار اے اتے فضا دے اندر اتے باہر ونج سگدے۔ ایں میزائل دی نقاب کشائی دے ویلھے اے دعویٰ وی کیتا گیا ہا جو اے 400 سیکنڈ وچ اسرائیل دے شہر تل ابیب تئیں پج سگدے۔ نال ہی حاجی زادہ اے دعویٰ وی کیتا ہا جو فتح کوں کہیں میزائل نال تباہ نئیں کیتا ونج سڳدا۔ الفتح-1 دی نقاب کشائی دے چار مہینے بعد پاسدارانِ انقلاب الفتح-2 دی نقاب کشائی کیتی جیہڑا 1500 کلومیٹر تئیں مار کرݨ آلے کروز میزائلاں دی ہک نسل اے۔ ایرانی میڈیا دے مطابق الفتح-2 بہوں ڳھٹ اوچائی تے پرواز کرݨ دی صلاحیت رکھیندے اتے پرواز دے دوران کئی واری آپݨاں راہہ وی بدل سگدے۔
