ملتان۔ 18 جون (اے پی پی) ایڈیشنل چیف سیکرٹری جنوبی پنجاب فواد ہاشم ربانی دی صدارت اچ اڄوکے مالی سال دے سالانہ ترقیاتی پروگرام دا جائزہ گھنݨ کیتے ہک اہم اجلاس تھیا جئیں وچ جنوبی پنجاب سیکرٹریٹ دے سارے اسپیشل سیکرٹریز شرکت کیتی۔ اجلاس وچ جاری ترقیاتی منصوبیں کوں درپیش چیلنجز دا تفصیلی جائزہ گھدا ڳئے اتے نویں بجٹ وچ شامل منصوبیں دی وختی تکمیل کیتے حکمت عملی بݨائی ڳئی۔ایڈیشنل چیف سیکرٹری فواد ہاشم ربانی اجلاس نال خطاب کریندے ݙسائے جو اڄوکے مالی سال وچ 2,233 ترقیاتی منصوبیں تے 131 ارب روپے خرچ کیتے ڳئن۔ انہاں ہدایت کیتی جو نویں مالی سال دیاں ترقیاتی سکیماں کوں ہک منظم میکانزم دے تحت اعلیٰ معیار اتے مقررہ شیڈول موجب مکمل کیتا ونڄے۔انہاں ݙسایا جو نویں مالی سال وچ بہاولپور اتے رحیم یار خان وچ برن یونٹس قائم کیتے ویسن جݙاں جو ضلع لیہ وچ میڈیکل کالج دے قیام کیتے وی فنڈز مختص کیتے ڳئن۔ فواد ہاشم ربانی ݙسایا جو چولستان وچ منہ کھر دی بیماری توں پاک (فری زون) علاقے دے قیام کیتے 75 کروڑ روپے مختص کیتے ڳئن، جئیں نال حلال گوشت دی برآمد وچ ودھارا تھیسی اتے کساناں دی خوشحالی ممکن تھی سڳسی۔ ایں توں انڄ غریب بیوہ تریمتاں کوں مفت مال ڈھور ݙیوݨ کیتے 1 ارب روپے دا بجٹ رکھیا ڳئے۔انہاں آکھیا جو نشتر ہسپتال وچ کینسر ڈیپارٹمنٹ دے قیام تے 75 کروڑ روپے خرچ کیتے ویسن، جݙاں جو وزیرِاعلیٰ پروگرام دے تحت 32 رورل ہیلتھ سینٹرز کوں اپ گریڈ کیتا ویسی۔ جنوبی پنجاب وچ شرمپ فارمنگ دے منصوبیں تے وی 1 ارب روپے خرچ کیتے ویسن۔ فواد ہاشم ربانی ہدایت کیتی جو سارے اسپیشل سیکرٹریز ترقیاتی منصوبیں دے معیار دی مانیٹرنگ یقینی بݨاون۔ ایں موقع تے اسپیشل سیکرٹریز ایڈیشنل چیف سیکرٹری کوں بریفنگ ݙیندے ݙسائے جو لال سوہانرا نیشنل پارک وچ ماحولیاتی نظام (ایکو سسٹم) کوں برقرار رکھݨ کیتے 50 کروڑ روپے خرچ کیتے ڳئن۔ غازی گھاٹ وچ 1,500 ایکڑ رقبے تے جنگل لاوݨ دا 83 فیصد کم مکمل تھی چُکئے۔ جنوبی پنجاب دے 519 بنیادی مراکز صحت وچوں 326 مراکز دی اپ گریڈیشن مکمل کر ڳھدی ڳئی اے جݙاں جو ہک سال اچ سڑکاں اتے عمارتاں دے 329 منصوبے مکمل کیتے ڳئن۔ اجلاس وچ جنوبی پنجاب دے کالجز وچ سمارٹ کلاس رومز بݨاوݨ دی وی سفارش کیتی ڳئی۔
