ملتان۔ 20 جون (اے پی پی) ایڈیشنل چیف سیکرٹری جنوبی پنجاب فواد ہاشم ربانی آکھیے جو ماحولیاتی تبدیلیاں دے تناظر وچ زراعت اتے لائیو سٹاک دے شعبیں وچ جدت اتے متبادل موقع لبھݨ ویلھے دی اہم لوڑھ اے۔انہاں آکھیے ضلع بہاولنگر وچ منہ کھر توں پاک زون دے قیام دی منظوری ݙے ݙتی ڳئی اے، منصوبے تے مجموعی طور تے 78 کروڑ 60 لکھ روپے دی لاڳت آسی، اڄوکے مالی سال دے بجٹ وچ منصوبے کیتے ابتدائی طور تے 25 کروڑ روپے مختص کر ݙتے ڳئن۔ انہاں آکھیا جو منہ کھر فری زون دے قیام نال حلال گوشت دیاں برآمدات وچ حائل وݙی رکاوٹ ہٹ ویسی، حلال گوشت دی برآمد نال ملک وچ زرمبادلہ آسی اتے لائیو سٹاک فارمرز اتے معیشت ݙوہیں کوں فیدہ تھیسی۔ایڈیشنل چیف سیکرٹری جنوبی پنجاب مزید آکھیے جو پاکستان دی زرعی جی ڈی پی دا 65 فیصد حصہ لائیو سٹاک دے شعبے نال جُڑیا ہویا اے، حلال گوشت دی عالمی مارکیٹ ایں ویلھے 800 ارب ڈالر تئیں پُڄ چُکی اے، 2034 تئیں ایں مارکیٹ دا حجم 1.71 کھرب ڈالر توں تجاوز کرویسی۔ پاکستان ایں وسیع عالمی مارکیٹ وچ اپݨا حصہ گھنݨ کیتے عملی اقدامات کریندا پئے۔ حلال گوشت دا کاروبار کرݨ آلیاں بین الاقوامی کمپنیاں کوں جنوبی پنجاب وچ پلانٹ لاوݨ دی ترغیب ݙتی ویسی۔
