اسلام آباد۔ 21 جون (اے پی پی سرائیکی نیوز سروس) سنگت وسمل پنوار ولوں سرائیکی دے مشہور شاعر ترقی پسند ادیب دانشورتے صحافی صابر چشتی دے 15 ویں ورھیݨے تے وستی کندھل کمبہار مائنر اݙہ چوک منڈہ کوٹ ادو اچ سرائیکی ادبی ثقافتی میلہ رکھیا ڳیا۔ صابر چشتی آپݨی دھرتی نال محبت کریندے ہن، تاں انہاں آپݨی شاعری اچ تھل نال خواجہ فرید دی شاعری وانڳوں تھل نال جڑت دا اظہار کیتے۔انہاں میڈیکل دی تعلیم ڳھدی پر انہاں عملی طور تے میڈیا اچ کم کیتا تے ملک دے وݙے اخبار اچ وسیب سنگ سرائیکی صفحہ شروع کیتا۔انہاں سرائیکی روہی ٹی وی اچ وی کتنا عرصہ کم کیتا۔انہاں دے 15 ویں ورھیݨے تے کوٹ ادو دی سماجی شخصیت مختیار بھٹہ ڳالھ مہاڑ کریندے آکھیا صابر چشتی دوستاں دے دوست ہن، انہاں آپݨی شاعری اچ عام لوکاں دی ڳالھ کیتی اے۔ انہاں ہمیش ترقی پسند معاشرے دی خواہش کیتی ہئی۔ اڄ اساں نینگراں کوں کٹھا کرتے انہاں دے مضامین ،شاعری ملٹی میڈیا دے ذریعے پڄیندے پیوں،ایں موقع تے کوٹ ادو دی ادبی شخصیت ملازم حسین قیصراے پی پی سرائیکی نیوز سروس نال ڳالھ مہاڑ کریندے آکھیے صابرچشتی آپݨی حیاتی تے اخیر توݨی سرائیکی وسوں نال جڑیے رہیے۔ بھاویں جو انہاں اخباراں تے ٹی وی اچ وی کم کیتا پر او آپݨی تل وطنی زبان کوں انہاں نہ چھوڑیا۔ایں موقع تے شاعر تے گلوکار وی موجود ہن جنہاں صابر چشتی دا کلام سݨایا، انہاں دا پتر راول وی سرائیکی ادبی ثقافتی میلے اچ موجود ہئی۔ صابری چشتی دی شاعری دی کتاب “جیوݨ اتم جوڳ” چھپ چکی اے۔(ڈاکٹر سعدیہ کمال)
