اسلام آباد۔ 22 جون (اے پی پی سرائیکی نیوز) ملک دے ݙوجھے شہراں وانڳوں بہاولپور اچ وی اسلامی دنیا دی پہلی تریمت وزیراعظم شہید محترمہ بے نظیر بھٹو دا 72 واں یوم پیدائش انتہائی عقیدت و احترام نال منایا ڳیا۔ ایں سلسلے اچ پاکستان پیپلز پارٹی میٹرو پولیٹن کارپوریشن دی تنظیم ولوں ہائی کورٹ بار روم اچ مرکزی تقریب دا انعقاد کیتا ڳیا جیں اچ پی ایل ایف ہائی کورٹ بار اَتے ݙویژنل پی ایل ایف دا خصوصی تعاون شامل ہئی۔تقریب دے مہمان خصوصی مرکزی سینئر نائب صدر پیپلز لائرز فورم پاکستان حاجی محمد شفیع چانڈیو، محمد صدیق چوہان صدر پی ایل ایف ہائی کورٹ بہاولپور، اختر ہاشمی ݙویژنل صدر پی ایل ایف، اَتے پیپلز پارٹی جنوبی پنجاب دے نائب صدر راؤ طارق ہن، جݙاں جو تقریب دی صدارت پاکستان پیپلز پارٹی میٹرو پولیٹن کارپوریشن دے صدر ملک امتیاز چنڑ کیتی۔ تقریب اچ وکلاء، پیپلز پارٹی دیاں ذیلی تنظیماں دے رہنماواں اَتے کارکنان وݙی تعداد اچ شرکت کیتی۔تقریب اچ کیک کٹ تے شہید محترمہ بے نظیر بھٹو دے اُچے درجات کیتے خصوصی دعا کیتی ڳئی۔ تقریب توں خطاب کریندے رہنماواں آکھیا جو شہید محترمہ بے نظیر بھٹو پاکستان کوں مستحکم بݨاوݨ، جمہوریت کوں تکڑا کرݨ اَتے ملک کوں بچاوݨ کیتے انتھک جدوجہد کیتی اَتے اپݨی جان دا نذرانہ ݙے تے لازوال قربانیاں ݙتیاں۔ انہاں آکھیا جو جمہوریت دی خاطر شہید بے نظیر بھٹو جان دی قربانی ݙتی پر پچھوں نئیں ہٹیاں، انہاں دی سیاسی بصیرت کوں پوری دنیا تسلیم کیتا، جیویں شہید ذوالفقار علی بھٹو عظیم لیڈر ہن اوویں ہی شہید بے نظیر بھٹو وی ہک عظیم سیاسی رہنما ہن جنھاں اپݨی پوری زندگی عوامی حقوق ، جمہوریت دی بحالی اَتے ملک دی مضبوطی سانڳے وقف کیتی۔انہاں آکھیا جو شہید محترمہ بے نظیر بھٹو ہک عظیم رہنما ہن اَتے انہاں دے نقش قدم تے چلدے چیئرمین بلاول بھٹو زرداری عالمی سطح تے پاکستان دا موقف مؤثر طریقے نال پیش کیتے جیڑھا پاکستانی قوم دی ہک وݙی کامیابی اے۔ایں موقع تے مسعود عزیز ہاشمی ایڈوکیٹ، احمد داؤد چوہان ایڈووکیٹ، محمد حسین آزاد ایڈووکیٹ، ملک شفقت ایڈوکیٹ، شیخ محبوب ایڈوکیٹ، شیخ لیاقت مجید، ملک شبیر ایڈوکیٹ، سیدہ فاطمہ ایڈوکیٹ، شہلا فیاض، عبدالقیوم ملک، شاہ خضر حسن، آصف بھارا ایڈوکیٹ، عبدالرحمن مغل، حسنین کلیم اللہ ایڈوکیٹ، پیٹر جان، خرم شہزاد، قاضی وامق، کلیم اللہ ایڈوکیٹ، راؤ رضوان عامر راجپوت، امجد بشیر، سہیل وڑائچ، شیخ عبدالغفار، سید اشفاق بخاری، سجاد عباسی، زبیر لودھی، عدیل اعجاز تے ݙوجھے شرکاء موجود ہن۔(ڈاکٹرسعدیہ کمال)
