ملتان۔ 23 جون (اے پی پی) چولستان دے تاریخی قلعیاں دی بحالی کیتے اقدامات دا آغاز کر ݙتا ڳئے، 2 ارب 90 کروڑ روپے دی لاگت نال قلعیاں دی اصل حالت اچ بحالی دا منصوبہ تیار اے۔آپݨے ہک بیان اچ ایڈیشنل چیف سیکرٹری جنوبی پنجاب فواد ہاشم ربانی آکھیا جو نویں مالی سال دے بجٹ اچ ایں مقصد کیتے 1 ارب 89 کروڑ روپے دے فنڈز مختص کیتے ڳئن، دراوڑ فورٹ دی اصل حالت اچ بحالی تے 1 ارب 80 کروڑ روپے خرچ ہوسن اَتے اے منصوبہ ݙو سال اچ مکمل کر ڳِھدا ویسی۔ انہاں ݙسیا جو جام گڑھ، مری گڑھ، موج گڑھ، دین گڑھ، پھلارا اَتے مروٹ فورٹس کوں وی اصل حالت اچ بحال کیتا ویسی۔فواد ہاشم ربانی دا آکھݨ ہا جو چولستان اچ 20 توں ودھ تاریخی قلعے مرحلہ وار محفوظ بݨائے ویسن۔ ایں نال تاریخی ورثے دی بحالی ہوسی اَتے خطے اچ سیاحت کوں فروغ ملسی۔
