واشنگٹن، تہران، تل ابیب۔ 24 جون (اے پی پی) امریکی صدر ڈونلڈ ٹرمپ آکھیا جو اسرائیل اَتے ایران نے جنگ بندی تے اتفاق کیتے۔ ایرانی وزیر خارجہ عباس عراقچی آکھیا جو اگر اسرائیل تہران دے ویلھے دے مطابق صبح 4 وجے تئیں ایرانی عوام دے خلاف آپݨی غیر قانونی جارحیت بند کر ݙیندے تاں ایں دے بعد ایران دا وی جوابی کارروائی جاری رکھݨ دا کوئی ارادہ نئیں۔ امریکی صدر ولوں جنگ بندی دے اعلان دے بعد خام تیل دی نرخ ڳھت تھین اَتے ایشیا دیاں سٹاک مارکیٹاں اچ مثبت ردعمل سامݨے آندا پئے۔
چائنا گلوبل ٹیلی ویژن نیٹ ورک دی رپورٹ دے مطابق امریکی صدر ڈونلڈ ٹرمپ مقامی ویلھے دے مطابق 23 جون دی شام چھی وجے آپݨے سوشل میڈیا پلیٹ فارم “ٹرتھ سوشل” تے پوسٹ کیتا جو اسرائیل اَتے ایران جامع جنگ بندی تے اتفاق کیتے۔ انہاں آکھیا جو ݙوہاں فریقاں وچال جنگ بندی تقریباً 6 گھنٹیاں اچ (یعنی مشرقی امریکی ویلھے دے مطابق 23 جون دی رات بارہ وجے) شروع تھیسی جئیں کوں انہاں “12 ݙینھ دی جنگ” دے خاتمے دا ناں ݙتا۔ انہاں جنگ بندی تے اسرائیل اَتے ایران کوں مبارخ وی ݙیتی۔ این بی سی نال ہک ٹیلی فونک انٹرویو اچ جݙݨ امریکی صدر ڈونلڈ ٹرمپ توں پُچھیا ڳیا جو جنگ بندی کݙاں تئیں جاری راہسی تاں انہاں آکھیا جو انہاں دے خیال اچ جنگ بندی مستقل اے اَتے ہمیشہ راہسی۔
اوں پاسے، ایران دے وزیر خارجہ عباس عراقچی 24 جون کوں جاری بیان اچ آکھیا جو ہݨ تئیں ایران اَتے اسرائیل جنگ بندی یا فوجی کارروائیاں دے خاتمے بارے کہیں معاہدے تے نئیں پُڄے۔ تاں جو، اگر اسرائیل تہران دے ویلھے دے مطابق صبح 4 وجے تئیں ایرانی عوام دے خلاف آپݨی جارحیت بند کر ݙیندے تاں ایں دے بعد ایران دا وی جوابی کارروائی جاری رکھݨ دا کوئی ارادہ نئیں۔ انہاں آکھیا جو اساݙیاں فوجی کارروائیاں دے خاتمے دا حتمی فیصلہ بعد اچ کیتا ویسی۔
ایں وچال، اسرائیلی آرمی ریڈیو 24 تاریخ کوں ہک سنیھا جاری کیتا جو اسرائیل ایران دے نال جنگ بندی معاہدے دے نیڑے ضرور اے لیکن 24 جون دی سویل پرامید طریقے نال لنگھݨی باقی اے۔ ریڈیو وجہ ݙسیندے ہوئیں آکھیا جو اسرائیل ایں ویلھے ایران تے شدید حملے کریندا پئے اَتے ایران ولوں وی اسرائیل تے شدید حملے دا خطرہ موجود اے۔ ہک ٻئی اطلاع دے مطابق 23 جون کوں امریکی سینٹرل کمانڈ ہک بیان جاری کیتا جئیں اچ آکھیا ڳیا جو امریکی فوج قطر دے نال رَل تے دوحہ دے نیڑے العدید ایئر بیس تے ایران دے بیلسٹک میزائل حملے دا کامیابی نال دفاع کیتا۔ امریکا اَتے قطر دا کوئی جانی نقصان نئیں تھیا۔
ایں دوران بی بی سی دے مطابق امریکی صدر ڈونلڈ ٹرمپ دے اسرائیل اَتے ایران وچال جنگ بندی دے اعلان دے بعد تیل دیاں قیمتاں اچ ڳھٹکی دا سلسلہ جاری اے۔ برینٹ کروڈ عالمی بینچ مارک سنوار کوں ست فیصد ڳھٹکی دے بعد ٻئے چار فیصد ݙہہ تے 68 ڈالر فی بیرل تے آڳئے۔ خام تیل دیاں قیمتاں ہݨ 12 جون دی نسبت گھٹ ہن جݙݨ اسرائیل ایران تے پہلا حملہ کیتا ہا۔ ایشیا دیاں سٹاک مارکیٹاں وی مشرق وسطیٰ اچ تھیوݨ آلیاں حالیہ پیشرفتاں تے مثبت ردعمل سامݨے آندا پئے۔ قطر اچ امریکی اڈے تے ایران دے میزائل حملے دے کجھ منٹ بعد عالمی منڈیاں اچ تیل دی قیمت تقریباً ساݙھے اٹھ فیصد ݙہہ تے 70.5 ڈالر فی بیرل دے نیڑے پُڄ ڳئی جئیں کوں اچانک اَتے وݙی ڳھٹکی تصور کیتا ویندا پئے۔
