پاکستان سی پیک منصوبیاں تے عملدرآمد کیتے چین نال رَل تے کم جاری رکھݨ کیتے پُرعزم اے، وزیراعظم شہباز شریف دی چینی سفیر نال ملاقات اچ ڳالھ مہاڑ

اسلام آباد۔ 24 جون (اے پی پی) وزیراعظم محمد شہباز شریف آکھیا جو پاکستان سی پیک منصوبیاں تے عملدرآمد کیتے چین نال رَل تے کم جاری رکھݨ کیتے پُرعزم اے، چین ولوں مالی اَتے اقتصادی مدد نال پاکستان دی معیشت کوں مستحکم کرݨ اچ مدد ملی جئیں دے نتیجے اچ ملک دے میکرو اکنامک آؤٹ لُک اچ بہتری آئی۔ منگل کوں وزیراعظم آفس دے میڈیا ونگ ولوں جاری بیان موجب اے ڳالھیں وزیراعظم پاکستان اچ چین دے سفیر جیانگ زیڈونگ نال ڳالھ مہاڑ کریندیں ہوئیں کیتی جنہاں انہاں نال ملاقات کیتی۔وزیراعظم چینی صدر شی جن پنگ اَتے چین دے وزیراعظم لی کیانگ کیتے نیک خواہشات اَتے آوݨ آلے ایس سی او سربراہی اجلاس دے کامیاب انعقاد کیتے نیک تمناواں دا اظہار کیتا۔ انہاں سربراہی اجلاس اچ شرکت کیتے آپݨے دورہ چین بارے ݙوہاں ملکاں وچال جاری مشاورت دا وی ذکر کیتا۔وزیراعظم محمد شہباز شریف پاکستان اَتے چین وچال تاریخی، گھاٹی اَتے آہنی “آل ویدر سٹریٹجک کوآپریٹو پارٹنرشپ” دا ݙسیندیں ہوئیں آکھیا جو پاکستان سی پیک دے جاری منصوبیاں دے کامیاب نفاذ کیتے چین نال رَل تے کم جاری رکھݨ کیتے پوری طرحاں پُرعزم اے۔ ایں بارے انہاں اہم منصوبیاں بشمول کے کے ایچ، ایم ایل۔ ون اَتے گوادر پورٹ کوں آپریشنل کرݨ دے نال نال زراعت، صنعت اَتے آئی ٹی دے شعبیاں اچ ݙوہاں ملکاں وچال تعاون تے روشنی پاتی۔ وزیراعظم چین ولوں مالی اَتے اقتصادی مدد کیتے پاکستان ولوں دلوں دوست ملک چین دی تعریف کیتی جئیں نال پاکستان دی معیشت کوں مستحکم کرݨ اچ مدد ملی اَتے ایں دے نتیجے اچ ملک دے میکرو اکنامک آؤٹ لُک اچ بہتری آئی۔ انہاں ٻیا آکھیا جو اے حکومت دے سماجی تے اقتصادی ترقی دے ایجنڈے کیتے اہم اے۔ ملاقات اچ علاقائی سلامتی دی صورتحال خصوصی طور ایران اسرائیل تنازعے اچ اڄوکی پیشرفت تے وی ڳالھ مہاڑ کیتی ڳئی۔ چینی سفیر مذاکرات اَتے سفارت کاری نال بحران دے پرامن حل کیتے اقوام متحدہ دی سلامتی کونسل سودھے ہر سفارتی فورم تے پاکستان دے فعال اَتے مثبت کردار دی تعریف کیتی۔چینی سفیر جیانگ زیڈونگ  وزیراعظم کوں پاک چین ݙو پاسہ تعاون دے مختلف پہلواں بارے ݙسیا اَتے آکھیا جو اگست 2025 دے چھیکڑ اچ وزیراعظم دے آوݨ آلے دورہ چین دی کامیابی کوں یقینی بݨاوݨ کیتے تیاریاں شروع کر ݙتی ڳئن۔