اسلام آباد۔ 24 جون(اے پی پی)وزیراعظم محمد شہباز شریف نیب دے زیر التواء مقدمات تیکھے نمٹاوݨ دی ہدایت کریندے آکھیے جو ملک توں کرپشن اَتے بد عنوانی مکاوݨ ترجیح اے، نیب مالیاتی فراڈ دے متاثرین دی مدد کرݨ اَتے انہاں دیاں رقماں دی تیکھے واپسی کیتے اقدامات چاوے۔ وزیراعظم محمد شہباز شریف نال چیئرمین قومی احتساب بیورو لیفٹیننٹ جنرل (ر) نذیر احمد بٹ ملین۔ چیئرمین نیب وزیراعظم کوں قومی احتساب بیورو دی ݙو سالہ کارکردگی رپورٹ برائے سال 24-2023 پیش کیتی۔ رپورٹ اچ قومی احتساب بیورو دے ہیڈ کوارٹرز اَتے علاقائی دفتراں دیاں ریکوریاں اَتے کارکردگی دی تفصیل شامل اے۔ وزیراعظم ملک توں بدعنوانی مکاوݨ کیتے قومی احتساب بیورو دے کردار دی تعریف کیتی اتے آکھیا جو ملک توں کرپشن اَتے بدعنوانی مکاوݨ ترجیح اے، کرپشن توں پاک پاکستان دے وژن سانڳے نیب کوں ساریاں ضروری سہولتاں ݙتیاں ویسن، نیب مالیاتی فراڈ دے متاثرین دی مدد کرݨ اَتے انہاں دیاں رقماں دی تیھکے واپسی دے اقدامات کرے۔ انہاں نیب دے زیر التواء مقدمات کوں وی تیکھے نمٹاوݨ دی ہدایت کیتی۔
چیئرمین نیب ݙسایا جو نیب گزریے ݙو سالاں اچ ارباں روپے دی خرد برد کیتی ڳئی رقماں دی ریکوری کیتی اے، سیکڑاں ایکڑ سرکاری اراضی غیر قانونی قبضے توں چھڑوائی اے جیندی مالیت ارباں روپے اے۔ سال 24-2023 اچ نیب700 انکوائریاں مکمل کیتن اَتے 218 تحقیقات مکمل کیتاں ڳن جݙاں جو 21 نویں ریفرنس دائر کیتے ڳن۔ ملاقات اچ وفاقی وزیر برائے قانون و انصاف اعظم نذیر تارڑ وی موجود ہن۔
