راولپنڈی۔ 24 جون(اے پی پی)سیکیورٹی فورسز دے جنوبی وزیرستان دے علاقے سراروغہ اچ خفیہ معلومات تے آپریشن اچ11 بھارتی حمایت یافتہ خوارج ہلاک اَتے 7 زخمی تھی ڳئے جݙاں جو پاک فوج دے ݙو جوان شہید تھی ڳئن۔ آئی ایس پی آر توں جاری بیان دے مطابق، سیکیورٹی فورسز جنوبی وزیرستان دے علاقے سراروغہ اچ خفیہ معلومات دی بنیاد تے دہشت گرد تنظیم “فتنہ الخوارج” دے خلاف ہک موثر آپریشن کیتے۔ اے خوارج بھارتی سرپرستی اچ ملک دشمن کارروائیاں اچ ملوث ہن۔ آپریشن اچ سیکیورٹی فورسز خوارج دے ٹھکانے کوں کامیابی نال نشانہ بݨایا جیںدے نتیجے اچ 11 بھارتی حمایت یافتہ خوارج جہنم واصل تھئے جݙاں جو 7 زخمی تھئن۔ فائرنگ دے شدید تبادلے اچ ضلع چکوال دے رہائشی پاک فوج دے بہادر افسر37 سالہ میجر سید معیز عباس شاہ اَتے لانس نائیک جبران اللہ عمر 27 سال، ضلع بنوں شہید تھئن۔ میجر معیز عباس شہید دی جرات اَتے قیادت کوں ہمیشہ یاد رکھیا ویسی۔ انہاں کئی آپریشنز اچ خوارج دے خلاف دلیرانہ کردار ادا کیتے۔ علاقے اچ مزید خوارج دی موجودگی کوں ختم کرݨ کیتے کلیئرنس آپریشن جاری اے۔
