اسلام آباد۔ 24 جون(اے پی پی)نائب وزیراعظم اَتے وزیر خارجہ سینیٹر محمد اسحاق ڈار ابوظہبی اچ پاکستان-یو اے ای دے سانجھے وزارتی کمیشن دے 12ویں اجلاس توں پہلے پاکستانی وفد دی تیاری دے اجلاس دی صدارت کیتی۔ دفتر خارجہ دے مطابق، اجلاس اچ وزیراعظم دے معاون خصوصی ایم طارق باجوہ، سپیشل سیکرٹری اقتصادی امور ڈویژن، یو اے ای اچ پاکستان دے سفیر، سیکرٹری تجارت، داخلہ، سمندر پار پاکستانی، آئی ٹی اَتے ایس آئی ایف سی اَتے وزارت فوڈ سکیورٹی اَتے وزارت خارجہ دے ایڈیشنل سیکرٹریز شرکت کیتی۔ اجلاس اچ جے ایم سی دے تفصیلی ایجنڈے سودھا مختلف ݙو طرفہ مصروفیات تے پیشرفت دا وی جائزہ ڳِھدا ڳیا۔ تجارت، سرمایہ کاری، توانائی، ٹیلی کمیونیکیشن اَتے متحدہ عرب امارات اچ پاکستانی کارکناں کیتے روزگار دے موقعیاں سودھا ترجیحی شعبیاں تے ڳالھ مہاڑ تھئی۔ نائب وزیراعظم متعلقہ وزارتاں اَتے محکمیاں دی فعال شمولیت تے انہاں دیاں کوششاں کوں سراہیا اَتے ڳالھ مہاڑ کوں ٹھوس نتائج اچ تبدیل کرݨ دی اہمیت تے زور ݙیندے آکھیا جو 12 ویں جے ایم سی پاکستان اَتے متحدہ عرب امارات وچال ݙو طرفہ تعاون اَتے ادارہ جاتی رابطیاں کوں مضبوط بݨاوݨ کیتے ٹھوس اقدامات دا باعث بݨسی۔
