لاہور۔ 25 جون (اے پی پی) پنجاب اچ مون سون بارشاں شروع تھی ڳئن، بارشاں دا پہلا اسپیل 1 جولائی تئیں جاری راہسی۔ ترجمان پی ڈی ایم اے موجب پنجاب دے کئی ضلعے منڈی بہاؤالدین، حافظ آباد، گجرات، گجرانوالہ، لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا اَتے میانوالی اچ تکھی ہوائیں اَتے ڳاڄ کھمݨ نال بارشاں دا سلسلہ شروع تھی ڳئے۔ اج خمیس 26 توں 28 جون تئیں جنوبی پنجاب اچ ملتان، ݙیرہ غازی خان، بہاولپور اَتے بہاولنگر اچ بارش دی پیشگوئی کیتی ڳئی اے۔بارشاں بارے ریلیف کمشنر پنجاب نبیل جاوید ولوں صوبے دے کمشنرز اَتے ڈپٹی کمشنرز کوں الرٹ رہݨ دیاں ہدایات جاری کر ݙتی ڳئن جئیں اچ آکھیا ڳئے جو ریسکیو، واسا سودھے سارے متعلقہ محکمے الرٹ رہن۔ ڈی جی پی ڈی ایم اے عرفان علی کاٹھیا آکھیا جو وزیراعلیٰ پنجاب دی ہدایت دے مطابق صوبے دی انتظامیہ کوں مون سون بارشاں بارے مراسلہ جاری کیتا ڳئے کیونجو ایں سال مون سون بارشاں 25 فیصد زیادہ تھیوݨ دی پیشگوئی اے۔ڈی جی عرفان علی کاٹھیا آکھیا جو محکمہ صحت، آبپاشی، تعمیر و مواصلات، لوکل گورنمنٹ اَتے لائیو سٹاک کوں الرٹ جاری کر ݙتا ڳئے۔ انہاں شہریاں توں اپیل کیتی اے جو خراب موسم دی صورتحال اچ احتیاطی تدابیر اختیار کرن۔ اندھاری تے طوفان دی صورتحال اچ محفوظ مقامات تے رہن، غیر ضروری سفر نہ کرن۔ ڈی جی پی ڈی ایم اے ٻیا آکھیا جو سیاح موسمی صورتحال دے مطابق آپݨا پلان ٻݨاون، بارشاں پاروں پہاڑی علاقیاں اچ لینڈ سلائیڈنگ دا خطرہ اے۔ انہاں آکھیا جو شہری آسمانی بجلی توں تحفظ کیتے محفوظ مقامات تے رہن، بجلی دی ڳاڄ کھمݨ اَتے طوفانی صورتحال اچ کھلے آسمان تلے ہرگز نہ ون٘ڄن، ایمرجنسی صورتحال اچ پی ڈی ایم اے ہیلپ لائن 1129 تے رابطہ کرن۔
