اسلام آباد۔ 9 جولائی(اے پی پی)وفاقی وزیر قومی غذائی تحفظ و تحقیق رانا تنویر حسین دی سربراہی اچ کھنݙ دی درآمد بارے سٹیئرنگ کمیٹی دا اجلاس تھیا جیںدے اچ کھنݙ دے معیار اَتے درآمد دے طریقہ کار تے غور کیتا ڳیا۔ وفاقی وزیر رانا تنویر حسین آکھیا جو چینی دی درآمد ٹریڈنگ کارپوریشن آف پاکستان دے ذریعے کیتی ویسی، چینی دی درآمد تے سارے ٹیکسز توں استثنیٰ ݙتا ڳئے۔ انہاں آکھیا جو پہلے مرحلے اچ 2 لکھ ٹن کھنݙ ٹینڈر جاری کیتا ویسی، ہک ہفتے بعد مزید 1.5 لکھ ٹن چینی دی درآمد دا ݙوجھا ٹینڈر تھیسی، درآمد کیتی ونجݨ والی چینی موٹے داݨے والی اَتے اعلیٰ معیار دی ہوسی۔ انہاں آکھیا جو چینی دی شپمنٹ دے بعد معائنہ لازمی قرار ݙتا ڳئے، عوام کوں معیاری اَتے سستی چینی فراہم کرݨ حکومت دی ترجیح اے، چینی دی درآمد دا عمل شفاف اَتے معیاری ہوسی۔ انہاں آکھیا جو سٹیئرنگ کمیٹی چینی دے معیار اَتے درآمدی طریقہ کار تے تفصیلی غور کیتے، اے فیصلے عوامی مفاد اَتے ملکی ضرورتاں سانڳے کیتے ڳئن۔
