راولپنڈی۔ 13 جولائی (اے پی پی) اسلام آباد، لاہور موٹر وے تے چکری انٹرچینج دے نیڑے ہک مسافر بس سڑک توں تلے ݙہہ پئی جئیں پاروں 5 بندے جاں بحق اَتے 36 بندے زخمی تھی ڳئے۔ حادثے دے فوراً بعد ریسکیو 1122 دی ٹیماں جائے وقوعہ تے پڄ ڳئیاں اَتے امدادی کارروائیاں شروع کیتی۔ ریسکیو ترجمان موجب زخمیاں کوں فوری طور مختلف ہسپتالاں اچ منتقل کیتا ڳئے۔ زخمیاں اچوں 22 کوں ڈی ایچ کیو ہسپتال چکوال، 8 کوں پمز ہسپتال، اسلام آباد، اَتے 6 کوں ڈی ایچ کیو ہسپتال، راولپنڈی منتقل کیتا ڳئے۔حادثے اچ جاں بحق تھیوݨ آلے بندیاں اچوں ہک دی لاش ڈی ایچ کیو، چکوال جݙاں جو چار بندیاں دی لاشاں ڈی ایچ کیو، راولپنڈی منتقل کیتی ڳئن۔ ترجمان موجب حادثے دا شکار تھیوݨ آلی بس لاہور ویندی پئی ہئی۔
