اسلام آباد۔ 14 جولائی (اے پی پی) چیئرمین پیاس انٹرنیشنل رانا عمران لطیف سندھ حکومت ولوں پلاسٹک شاپنگ بیگز تے مکمل پابندی بارے فیصلے کوں خوش آئند قرار ݙیندیں ہوئیں زور ݙتا جو قومی سطح تے وی پلاسٹک شاپنگ بیگز دے استعمال دے خلاف مکمل پابندی اَتے ایں تے مؤثر عملدرآمد یقینی بݨایا ونڄے۔ سنوار کوں جاری ہک بیان اچ رانا عمران لطیف آکھیا جو شاپنگ بیگز ہک خاموش قاتل ہن جو اساݙی آندی نسلاں دی صحت اَتے اساݙے ماحول کوں مستقل طور تے تباہ کریندے پئن۔ ہݨ ویلھا آ ڳئے جو حکومت قومی سطح تے انہاں دے خلاف سخت قانون سازی کرے اَتے ایں تے مؤثر عملدرآمد یقینی بݨاوے۔ انہاں آکھیا جو پاکستان اچ شاپنگ بیگز تیزی نال انسانی صحت، زمینی زرخیزی، آبی حیات اَتے فضائی ماحول کیتے ہک زہر قاتل بݨ ڳئے۔ ماحولیاتی ماہرین اَتے انسانی حقوق دی تنظیماں مسلسل خبردار کریندی پئن جو انہاں بیگز اچ شامل خطرناک کیمیکلز نال نہ صرف کینسر، بانجھ پن، ساہ دی بیماریاں اَتے ہارمنی نظام دی خرابی جنم گھندی اے بلکہ اے اساݙی فضا، زمین، اَتے پاݨی کوں وی مستقل نقصان ݙیندے پئن۔ پیاس انٹرنیشنل زور ݙتا جو اے صورتحال فوری اَتے سخت اقدامات دی متقاضی اے۔۔
