اسلام آباد۔17جولائی (اے پی پی):نائب وزیراعظم تے وزیر خارجہ سینیٹر محمد اسحاق ڈار (اڄ) خمیس 17 جولائی 2025 کوں ازبکستان، افغانستان، پاکستان (یو اے پی) ریلوے منصوبے دے مشترکہ فزیبلٹی مطالعے دے فریم ورک معاہدے تے دستخط کیتے افغانستان دے راجگڑھ کابل دا ہک ݙینھ دا دورہ کریسن۔ ترجمان دفتر خارجہ ولوں جاری بیان موجب نائب وزیراعظم تے وزیر خارجہ دے نال ہک اعلیٰ سطحی وفد وی ہوسی جئیں اچ وزیر ریلوے، افغانستان دے خصوصی نمائندے/معاون خصوصی برائے وزیراعظم اتے سیکرٹری ریلوے شامل ہن۔ یو اے پی ریلوے منصوبے دا مقصد ازبکستان کوں افغانستان دے راستے پاکستان نال ریل دے ذریعے جوڑݨ اتے وسط ایشیائی ملکاں کوں پاکستانی بندرگاہواں تئیں رسائی ݙیوݨ اے۔ اے منصوبہ علاقائی تجارت اتے ٹرانزٹ کوں سوکھا بݨا تے خطے اچ استحکام، ترقی اتے خوشحالی کوں ودھارا ݙیسی۔ نائب وزیراعظم،وزیر خارجہ دا اے دورہ پاکستان دے ایں منصوبے دی کامیاب تکمیل کیتے بھرپور عزم دا عکاس اے۔ کابل اچ ترائیں ملکاں وچال سانجھی فزیبلٹی مطالعے دے فریم ورک معاہدے تے دستخط ایں دی عملی تکمیل ݙے ہک اہم قدم ہوسی۔ دورے اچ نائب وزیراعظم،وزیر خارجہ افغانستان دے قائم مقام وزیر خارجہ نال ملاقات کریسن اتے افغانستان دے قائم مقام وزیراعظم نال وی گالھ مہاڑ کریسن، جئیں اچ ݙوہیں ملکاں دے آپسی تعلقات اتے علاقائی تے بین الاقوامی امور ڳالھ کیتی ویسی۔
