اسلام آباد۔17جولائی (اے پی پی) پاکستان برطانیہ دی فضائی سلامتی کمیٹی دے فیصلے دا خیر مقدم کیتے جئیں دے تحت پاکستانی ہوائی کمپنیاں کوں یوکے ایئر سیفٹی لسٹ توں ہٹا ݙتا ڳئے۔ ترجمان دفتر خارجہ ولوں جاری بیان موجب اے فیصلے دے بعد پنج سال دے وقفے توں بعد برطانیہ کیتے پاکستانی تجارتی پروازاں ولا شروع تھی سڳسن۔ اے ہک اہم فیصلہ اے جیڑھا پاکستان دی گزریل کئی سالاں دی مسلسل سفارتی اتے تکنیکی کوششاں دی تصدیق کریندے۔ پاکستان بین الاقوامی فضائی سلامتی دے معیار پورا کرݨ اتے برقرار رکھݨ دا آپݨا عزم ݙکھائے۔ پابندی دے خاتمے نال پاکستان اتے برطانیہ وچال رابطے دی بحالی تھیسی، جیڑھی برطانیہ اچ رہݨ آلے لکھاں پاکستانیاں کیتے سہولت ݙیسی اتے ݙوہیں ملکاں وچال معاشی، ثقافتی اتے عوامی تعلقات کوں مضبوط بݨیسی۔ برطانیہ اچ تقریباً 1.7 ملین پاکستانی نژاد لوکاں دی وݙی کمیونٹی کوں ݙیکھدے ہوئیں، سِدھی پروازاں دی بحالی نال خانداناں، کاروبار، سیاحت اتے تجارت کوں بہوں فیدہ تھیسی۔ پاکستان برطانیہ دا شکریہ ادا کریندے جو ایں پاکستان دی فضائی سلامتی دے معیاراں تے پورا لہݨ دی کوششاں دی تعریف کیتی اتے تشخیص دے عمل اچ تعاون کیتا۔
