ڈیرہ غازی خان ۔ 23 جولائی (اے پی پی) ڈیرہ غازیخان توں بلوچستان ونڄݨ آلی بین الصوبائی پبلک ٹرانسپورٹ کیتے سکیورٹی اتے نظم و ضبط بارے باقاعدہ ایس او پیز جاری کر ݙتے ڳئن۔ ڈپٹی کمشنر محمد عثمان خالد دی صدارت اچ تھیوݨ آلے ہنگامی اجلاس اچ ٹرانسپورٹراں کوں اعتماد اچ گھندیں ہوئیں قواعد و ضوابط تے سختی نال عملدرآمد کراوݨ دی ہدایت کیتی ڳئی۔ ڈپٹی کمشنر اجلاس توں خطاب کریندیں ہوئیں آکھیا جو پنجاب اتے بلوچستان حکومت دی آپسی مشاورت نال اے فیصلہ کیتا ڳئے جو مسافراں اتے ٹرانسپورٹ عملہ دے تحفظ کوں یقینی بݨاوݨ کیتے ہݨ بلوچستان اچ صرف ݙینھ دی روشنی اچ ای پبلک ٹرانسپورٹ کوں داخلے دی اجازت ݙتی ویسی۔ شام توں بعد کوئی وی مسافر گاݙی بلوچستان اچ داخل نہ تھی سڳسی۔ ڈپٹی کمشنر ٻئی ہدایت ݙتی جو غیر ملکیاں دا ڈیرہ غازی خان شہر اچ داخلہ منع اے۔ سرحدی مقامات خاص کر ترنمن اتے بواٹا تے مسافراں دی سنڄاݨ دی باقاعدہ تصدیق توں بعد ای سوار کیتا ویسی۔ ڈپٹی کمشنر محمد عثمان خالد آکھیا جو سکیورٹی انتظامات دے تحت بلوچستان ونڄݨ آلی ہر بس اتے کوچ اچ ݙو مسلح سکیورٹی گارڈز دی موجودگی لازمی قرار ݙتی ڳئی اے۔ پبلک ٹرانسپورٹ روانہ کرݨ توں پہلے سارے بس اڈیاں تے مسافراں اتے ڈرائیوراں دی ویڈیو ریکارڈنگ کیتی ویسی جݙاں جو گاݙیاں کوں سکیورٹی قافلیاں دی صورت اچ روانہ کیتا ویسی۔ ساری گاݙیاں اچ سی سی ٹی وی کیمرے، جی پی ایس ٹریکنگ اتے ایمرجنسی الارم سسٹم نصب کیتا ویسی تاں جو کہیں وی ہنگامی صورتحال اچ فوری ایکشن گھدا ونڄ سڳے ۔ ڈپٹی کمشنر محمد عثمان خالد آکھیا جو شہریاں دی جان و مال دا تحفظ انتظامیہ دی پہلی ترجیح اے اتے سکیورٹی اقدامات کوں ٻیا مؤثر اتے مربوط بݨایا ویندا پئے۔ اجلاس اچ پولیٹیکل اسسٹنٹ کوہ سلیمان محمد اسد چانڈیہ، اسسٹنٹ کمشنرز تیمور عثمان، نذر حسین کورائی، سیکرٹری آر ٹی اے ثنا اللہ ریاض، پیٹرولنگ پولیس اتے بئے محکمہ جات دے افسر، ٹرانسپورٹراں دے نمائندے وی موجود ہن۔
