ملتان۔ 28 جولائی (اے پی پی) حضرت بہاؤالدین زکریا ملتانیؒ دا 786 واں عرس 31 جولائی توں ملتان اچ شروع تھیسی۔ ضلعی انتظامیہ ترائے ݙینھ دے عرس دی تقریباں دے انتظامات شروع کر ݙتن ۔ ایں بارے ڈپٹی کمشنر وسیم حامد سندھو دی صدارت اچ ضلعی محکماں دا اجلاس تھیا جئیں اچ اسسٹنٹ کمشنر سٹی عبدلسمیع شیخ سودھے ضلعی حکام موجود ہن ۔ پولیس، اوقاف، کارپوریشن، ریسکیو 1122 سودھے سارے محکمیاں بریفنگ وی ݙتی۔ ایں موقع تے ڈپٹی کمشنر وسیم حامد سندھو آکھیا جو عرس مبارک تے زائرین دی مکمل مہمان نوازی کریسوں۔ بہترین صفائی تے سیکورٹی انتظامات نال ساری تقریباں دے شرکاء کوں خوشگوار تاثر ملسی۔ ڈپٹی کمشنر حکم ݙتا جو زائرین کیتے بہترین قیام و طعام اتے مؤثر ٹریفک پلان ٻݨا ݙتا ونڄے اتے سارے ضلعی محکمے عرس دے ترائے ݙینھ تئیں آپݨے کیمپس قلعہ کہنہ تے قائم رکھن۔
