جمیکا۔29 جولائی (اے پی پی) ویسٹ انڈیز اتے پاکستان دی کرکٹ ٹیماں وچال ترائے ٹی ٹونٹی بین الاقوامی میچاں دی سیریز دا پہلا میچ یکم اگست کوں سینٹرل بروورڈ ریجنل پارک سٹیڈیم ٹرف گراؤنڈ، لاڈر ہل، فلوریڈا اچ کھیݙیا ویسی۔ اے میچ نائٹ ہوسی اتے فلڈ لائٹس دی روشنی اچ کھیݙیا ویسی۔ پاکستان دی کرکٹ ٹیم اڄ کل ویسٹ انڈیز دے دورہ تے اے اتے گرین شرٹس آپݨے دورہ ویسٹ انڈیز اچ میزبان ٹیم دے خلاف 3 ٹی ٹونٹی اتے 3 ہک ݙینھ دے بین الاقوامی میچاں دی سیریز کھیݙسی۔ ویسٹ انڈیز ٹیم دے خلاف 3 ٹی ٹونٹی بین الاقوامی میچاں دی سیریز اچ پاکستان ٹیم کوں مایہ ناز آل راؤنڈر سلمان آغا لیڈ کریسن ۔ ݙوہاں ٹیماں وچال ترائے ٹی ٹونٹی میچاں دی سیریز دا ݙوجھا میچ 3 اگست کوں کھیݙیا ویسی جݙاں جو تریجھا اتے چھیکڑی میچ 4 اگست کوں کھیݙیا ویسی۔ ترائے ٹی ٹونٹی بین الاقوامی میچاں تے مشتمل سیریز دے ترائیں میچز فلڈ لائٹس دی روشنی اچ سینٹرل بروورڈ ریجنل پارک سٹیڈیم ٹرف گراؤنڈ، لاڈر ہل، فلوریڈا اچ ای کھیݙے ویسن۔ ٹی ٹونٹی سیریز مکمل تھیوݨ دے بعد پاکستان دی ٹیم برائن لارا سٹیڈیم، تاروبا، ٹرینیڈاڈ پڄسی جتھ ترائے ہک ݙینھ دے میچاں دی سیریز دا پہلا میچ 8 اگست کوں کھیݙیا ویسی ، ون ڈے سیریز دا ݙوجھا میچ 10 اگست کوں کھیݙیا ویسی جݙاں جو تریجھا اتے چھیکڑی ون ڈے میچ 12 اگست کوں کھیݙیا ویسی۔ ون ڈے سیریز اچ گرین شرٹس کوں مایہ ناز وکٹ کیپر بلے باز محمد رضوان لیڈ کریسن۔
