ملتان۔ 30 جولائی (اے پی پی) ملتان دے عظیم صوفی بزرگ حضرت بہاؤالدین زکریا ملتانیؒ دے سالانہ عرس مبارک دی مناسبت نال 2 اگست 2025 کوں مقامی چھٹی دا اعلان کر ݙتا ڳئے۔ ایں بارے ڈپٹی کمشنر ملتان وسیم حامد سندھو باقاعدہ نوٹیفکیشن جاری کر ݙتے۔نوٹیفکیشن موجب 2 اگست بروز ہفتہ پورے ضلع اچ سارے سرکاری دفتر، ادارے، تعلیمی ادارے اتے عدالتاں بند رہسن۔ چھٹی صرف ضلع ملتان دی حد تئیں محدود ہوسی اتے ایندا اطلاق وفاقی اداریاں یا بینکاں تے نہ ہوسی۔حضرت بہاؤالدین زکریا ملتانیؒ دا عرس ہر سال ماہ صفر المظفر اچ عقیدت تے احترام نال منایا ویندے جئیں اچ ملک بھر توں زائرین دی وݙی تعداد شرکت کریندی اے۔ ایں موقع تے زائرین دی سہولت، سکیورٹی اتے ٹریفک دی روانی کوں یقینی بݨاوݨ کیتے ضلعی انتظامیہ پیشگی اقدامات شروع کر ݙتن۔ ڈپٹی کمشنر وسیم حامد سندھو متعلقہ محکمہ جات کوں ہدایت کیتی اے جو عرس دے انتظامات اچ کوئی کوتاہی نہ کیتی ونڄے اتے زائرین کوں ہر ممکن سہولت ݙتی ونڄے تاں جو او ایں روحانی اجتماع اچ اطمینان تے سکون نال شرکت کرسڳن۔ واضح رہوے جو حضرت بہاؤالدین زکریا ملتانیؒ برصغیر پاک و ہند دے عظیم روحانی پیشوا اتے سلسلہ سہروردیہ دے ممتاز بزرگ ہن، جنہاں خطہ ملتان اچ اسلام دے فروغ اتے صوفی تعلیمات دے فروغ اچ تاریخی کردار ادا کیتا۔
