موسمیاتی تبدیلیاں پاروں تھیوݨ آلے چیلنجز نال نبڑݨ کیتے اقدامات ویلھے دی لوڑھ ہن، وزیراعظم شہباز شریف

گلگت۔4اگست (اے پی پی) وزیراعظم محمد شہباز شریف موسمیاتی تبدیلیاں پاروں تھیوݨ آلے چیلنجز نال نبڑݨ کیتے اقدامات کوں ویلھے دی اہم ترین لوڑھ قرار ݙیندیں ہوئیں آکھیا جو “پاکستان اچ ہر سال موسمیاتی تبدیلیاں نال تباہی تھیندی پئی اے۔ سنوار ایتھاں دورے اچ گلگت اچ اڄوکی بارشاں تے سیلابی صورتحال دا جائزہ گھنݨ کیتے تھیوݨ اجلاس توں خطاب کریندیں ہوئیں وزیراعظم آکھیا جو “اڄوکے ݙینہاں اچ گلگت بلتستان اچ مختلف جہیں تے بدل پھٹݨ پاروں شدید تباہی تھئی جئیں نال بابوسر، گانچھے، دیامر سودھے کئی علاقے شدید متاثر تھئے۔ وزیراعظم حادثیاں اچ فوت تھیوݨ آلیاں کیتے مغفرت اتے زخمیاں دی جلدی صحت یابی دی دعا منڳدیں ہوئیں آکھیا جو “اڄ صورتحال دا جائزہ گھنݨ کیتے او مواصلات، آبی وسائل، این ڈی ایم اے سودھے متعلقہ وزارتاں اتے محکمہ جات دے وزیراں اتے حکام دے نال ایتھ آئن۔ وزیراعظم آکھیا جو “عالمی سطح تے کاربن گیسز دے اخراج اچ اساݙا حصہ بہوں گھٹ اے لیکن پاکستان موسمیاتی تبدیلیاں توں شدید متاثر تھیوݨ آلے ملکاں اچ شامل اے۔انہاں آکھیا جو “ہر سال سیلاباں نال تباہی آندی اے، موسمیاتی تبدیلیاں دے چیلنجز نال نبڑݨ کیتے اقدامات ویلھے دی لوڑھ ہن۔ انہاں وزارت موسمیاتی تبدیلی کوں ہدایت کیتی جو او ایں بارے ضروری اقدامات کرن، “دنیا اچ موسمیاتی تبدیلی دے حوالے نال بہوں کانفرنساں تھیندن جنہاں اچ اساں وی شرکت کریندوں، دنیا توں لچک دار انفراسٹرکچر دے حوالے نال فنڈز ڳھن تے آوݨ کیوں جو گلگت بلتستان اتے آزاد کشمیر سوھے پورا ملک موسمیاتی تبدیلیاں توں متاثر تھیندا پئے۔ وزیراعظم آکھیا جو “او جلدی ول گلگت بلتستان دا دورہ کریسن جئیں اچ گلگت بلتستان اچ دانش سکول دا سنگ بنیاد رکھیا ویسی۔ انہاں آکھیا جو “او سولر پارک منصوبے دی ذاتی طور تے نگرانی کریندے پئن ایں تے کم تکھا کریسوں اتے ایں منصوبے کوں آپݨی ذاتی نگرانی اچ مکمل کریسوں۔