بھارت کشمیریاں دے بنیادی انسانی حقوق کھس تے پوری وادی کوں ہک کھلی جیل اچ بدل ݙیتے، چیئرمین سینیٹ سید یوسف رضا گیلانی دا یوم استحصال کشمیر دے موقع تے سنیھا

اسلام آباد۔5اگست (اے پی پی) چیئرمین سینیٹ سید یوسف رضا گیلانی آکھیا اے جو بھارت مقبوضہ جموں تے کشمیر اچ غیر قانونی اتے غیر آئینی اقدامات نال نہ صرف کشمیریاں دے بنیادی انسانی حقوق کھسے بلکہ پوری وادی کوں ہک کھلی جیل وچ بدل ݙتے، اساں مسئلہ کشمیر دا پرامن، منصفانہ اتے اقوامِ متحدہ دی قرارداداں دے مطابق حل چاہندوں۔ یوم استحصال کشمیر دے موقع تے آپݨے سنیھے اچ انہاں آکھیا جو 5 اگست 2019 او ݙکھ دا ݙینہہ ہئی جݙاں بھارت مقبوضہ جموں تے کشمیر اچ غیر قانونی اتے غیر آئینی اقدامات نال نہ صرف کشمیریاں دے بنیادی انسانی حقوق کھسے بلکہ پوری وادی کوں ہک کھلی جیل اچ بدل ݙتا۔ انہاں آکھیا جو “بھارتی حکومت ہک پاسے دے اقدام دے تحت مقبوضہ وادی اچ سب توں وݙا لاک ڈاؤن لاگو کیتا جئیں اچ کشمیری عوام کوں انہاں دے گھراں اچ قید کر تے ظلم، جبر اتے وحشت دی بدترین مثال قائم کیتی ڳئی، ضعیف ہووݨ یا نیانڑیں، تریمتاں ہووݨ یا نوجوان، سارے کوں ریاستی جبر دا نشانہ بݨیندیں ہوئیں جیلاں اچ سٹیا ڳیا، ایں طرح دی وحشت دی مثال انسانی تاریخ وچ گھٹ ملدی اے۔ چیئرمین سینیٹ آکھیا جو “مسئلہ کشمیر دا منصفانہ حل نہ صرف جنوبی ایشیا دے امن و استحکام کیتے ضروری اے بلکہ اے عالمی امن دے تحفظ کیتے وی ضروری تھی ڳئے، بھارت دا کُوڑا پروپیگنڈہ اتے طاقت دے زور تے کشمیریاں کوں چپ کراوݨ دی کوششاں کݙاہیں کامیاب نہ تھیسن۔انہاں آکھیا جو “کشمیریاں دی قربانیاں ضائع نہ ویسن، حق خود ارادیت دی جدوجہد ضرور کامیاب تھیسی۔ چیئرمین سینیٹ آکھیا جو “پاکستان کشمیری عوام دے نال کھڑے اتے کھڑا رہسی۔