اسلام آباد۔5اگست (اے پی پی) وزیر دفاع خواجہ محمد آصف قومی اسمبلی اچ ݙسائے جو “حکومت اربعین کیتے ایران اتے عراق ونجݨ آلے زائرین دی سہولت کیتے سارے ضروری اقدامات کریندی پئی اے۔” قومی اسمبلی اچ الیندے انہاں آکھیا جو “زائرین دی حفاظت اتے سہولت ترجیح اے اتے متعلقہ محکمیاں کوں ہدایت کیتی ڳئی اے جو او پورے سفر اچ مناسب انتظامات کرن۔ حکومت سنگین سکیورٹی خدشات بالخصوص زائرین دے قافلیاں کوں نشانہ بݨاوݨ آلے دہشت گرد حملیاں دے خطرے پاروں کوئٹہ توں 800 کلومیٹر دے رستے تے زمینی سفر تے پابندی لا ݙتی اے، انہاں خطرات کوں گھٹ کرݨ کیتے وفاقی حکومت بلوچستان حکومت کوں کوئٹہ توں براہ راست پروازاں چلاوݨ دا اختیار ݙتے جیندے نال زائرین آپݨیاں منزلاں تئیں ہوائی جہاز تے محفوظ سفر کر سڳسن۔” وزیر دفاع ایوان کوں ݙسایا جو “اینڄھی ہک پرواز پہلے ہی شروع تھی چکی اے اتے حکومت لوڑھ دے مطابق روزانہ ٻیاں ݙو پروازاں یا گھٹ توں گھٹ ہک باقاعدہ سروس کیتے اقدامات کریندی پئی اے۔ انہاں آکھیا جو ایران اتے عراق دے ہوائی اڈیاں توں زائرین دے مطلوبہ علاقیاں کوں آوݨ ونڄݨ کیتے وی انتظامات کیتے ڳئن، پچھلے چار ݙینہاں اچ اشتہارات ݙتے ڳن جیندے اچ نجی ہوائی کمپنیاں کوں روٹ تے کم کرݨ دی دعوت ݙتی ڳئی ہئی اتے ساریاں لائسنس یافتہ نجی ایئر لائنز کوں کم کرݨ دی اجازت ݙتی ڳئی ہئی، زائرین دی ودھ توں ودھ تعداد کوں محفوظ طریقے نال سفر کرݨ کیتے چارٹرڈ پروازاں دی وی منظوری ݙتی ڳئی اے تاں جو محفوظ اتے آسان سفر یقینی ٻݨایا ونڄے۔ انہاں آکھیا جو “ایرانی صدر دے حالیہ دورہ پاکستان اچ وی ایں معاملے تے گالھ تھئی اے اتے ایران پاکستانی زائرین دی نقل و حرکت اچ سہولت کیتے اضافی پرواز دی اجازت ݙتی ہئی، حکومت سارے اربعین زائرین کیتے محفوظ، آرام دہ اتے بروقت آوݨ ونجݨ یقینی بݨاوݨ کیتے ہر ممکن کوشش کریندی پئی اے۔
