اسلام آباد۔5اگست(اے پی پی)اقتصادی رابطہ کمیٹی الیکٹرک وہیکل سبسڈی، ریمٹنس سکیم کلیمز دی ادائیگی کیتے ٹیکنیکل سپلیمنٹری گرانٹ دی منظوری ݙے ݙتی۔ اقتصادی رابطہ کمیٹی (ای سی سی) دا اجلاس وزیر خزانہ و ریونیو سینیٹر محمد اورنگزیب دی صدارت اچ ویڈیو لنک تے تھیا۔ اجلاس اچ کئی اہم اقتصادی امور تے غور تھیا جیندے اچ نویں الیکٹرک وہیکل پالیسی دا اجراء، قائداعظم یونیورسٹی کیتے امدادی گرانٹ اچ توسیع اتے ٹیلی گرافک ٹرانسفر چارجز انسینٹو سکیم بارے ٹیکنیکل سپلیمنٹری گرانٹ دی منظوری شامل ہئی۔ اجلاس اچ وفاقی وزیر برائے توانائی سردار اویس احمد خان لغاری، وفاقی وزیر برائے پٹرولیم علی پرویز ملک، وفاقی وزیر برائے قومی غذائی تحفظ و تحقیق رانا تنویر حسین اتے ٻئے متعلقہ وزارتاں و اداریاں دے اعلیٰ حکام شرکت کیتی۔ اجلاس اچ وزارت صنعت و پیداوار ولوں ہک سمری منظور کیتی ڳئی جیںدے اچ شہریاں کوں الیکٹرک بائیکس اتے رکشے/لوڈرز ݙیوݨ کیتے سبسڈی سکیم دا نفاذ تجویز کیتا ڳیا ہا جیندے کیتے مالی سال 2025-26 دے بجٹ اچ 9 ارب روپے دی رقم مختص کیتی ڳئی اے۔ ایں سکیم دے تحت سرکاری کالجاں دے نمایاں کارکردگی دے حامل طلباء کوں مفت الیکٹرک بائیکس ݙتیاں ویسن۔ منصوبے موجب ݙو مرحلیاں اچ ہک لکھ 16 ہزار الیکٹرک بائیکس اتے 3,170 الیکٹرک رکشے/لوڈرز ݙتے ویسن۔ ابتدائی مرحلے اچ 40 ہزار الیکٹرک بائیکس اتے 1,000 الیکٹرک رکشے/لوڈرز ݙتے ویسن۔ ای سی سی وزارت خزانہ دی درخواست تے ٹیلی گرافک ٹرانسفر چارجز انسینٹو سکیم دے تحت گزریل مالی سال دے بقایاجات دی ادائیگی کیتے 30 ارب روپے دی ٹیکنیکل سپلیمنٹری گرانٹ دی وی منظوری ݙتی۔ بقایاجات دی مجموعی رقم 58.26 ارب روپے اے۔ کمیٹی وزارت خزانہ کوں ہدایت ݙتی جو “او سٹیٹ بینک آف پاکستان دے نال ادائیگی دے طریقہ کار تے فوری کم کرے، ایں سکیم دے فائدے و نقصانات، مالیاتی پہلوواں اتے موقعے دے اخراجات دا تفصیلی جائزہ ڳھن تے سٹیک ہولڈرز دی مشاورت نال سفارشات ستمبر اچ پیش کیتیاں ونڄن جݙاں جو ابتدائی رپورٹ اگست دے چھیکڑ تئیں مکمل کیتی ونڄے۔” ایں توں علاوہ ای سی سی قائداعظم یونیورسٹی کیتے 2 ارب روپے دی بیل آؤٹ گرانٹ دی اصولی منظوری وی ݙے ݙتی۔
