پی ڈبلیو ڈی دے ملازماں کیتے گولڈن شیک ہینڈ سودھے ٻئے آپشنز موجود ہن، ریاض حسین پیرزادہ

اسلام آباد۔7اگست (اے پی پی) وفاقی وزیر ہاؤسنگ ریاض حسین پیرزادہ آکھیا جو پی ڈبلیو ڈی دے ملازماں کیتے گولڈن شیک ہینڈ سودھے ٻئے آپشنز موجود ہن، عوامی حکومت کہیں ملازم کوں خالی ہتھ ملازمت توں نہ ہٹیسی۔ خمیس کوں قومی اسمبلی اچ شاہدہ اختر علی اتے ٻئے لوکاں دے پی ڈبلیو ڈی دے ملازماں کوں تنخواہوہیں نہ ملݨ بارے توجہ ݙیواؤ نوٹس دے جواب اچ انہاں آکھیا جو عملہ دی کل تعداد 6186 اے، انہاں اچ ریگولر 2 ہزار توں ودھ ہن، انہاں کوں تنخواہیں ݙے ݙتی ڳئن،2025-26 دے بجٹ اچ سی ڈی اے کوں ݙتے ڳئے سٹاف کوں جون تئیں تنخواہیں ݙے ݙتی ڳئن۔ ریگولر سٹاف بارے قائمہ کمیٹی توں بل منظور تھی ڳئے، ہݨ گولڈن شیک ہینڈ دی وی انہاں کوں اجازت ملسی، اے کابینہ دا فیصلہ اے جو سارے ملازماں کوں ایڈجسٹ کیتا ویسی، ایں بارے نوکریاں توں کڈھݨ بارے پروپیگنڈا کیتا ویندا پئے ۔ نعیمہ کشور دے سوال دے جواب اچ انہاں آکھیا جو یوٹیلیٹی سٹورز دے ملازماں بارے فیصلہ تھیسی، کہیں کوں خالی ہتھ گھر نہ بھیجیسوں، اے عوامی حکومت دا فیصلہ اے۔