ربیع الاول اچ 50ویں بین الاقوامی سیرت النبی ﷺ کانفرنس دا انعقاد شایان شان طریقے نال کیتا ویسی، سردار محمد یوسف

اسلام آباد۔7اگست (اے پی پی) ربیع الاول دے مہینے اچ اچ 50ویں بین الاقوامی سیرت النبی ﷺ کانفرنس دا انعقاد شایان شان طریقے نال کیتا ویسی۔ اے ڳالھ وفاقی وزیر مذہبی امور سردار محمد یوسف 50ویں بین الاقوامی سیرت النبی ﷺ کانفرنس دے انعقاد دیاں تیاریاں دے جائزہ اجلاس دی صدارت کریندیں آکھی۔ انہاں دا آکھݨ ہئی جو “وزارت ایں سال 50ویں بین الاقوامی سیرت النبی ﷺ کانفرنس دے انعقاد دی سعادت حاصل کریندی پئی اے۔” “نویں نسل کوں اسلامی تعلیمات اتے سیرت نبوی ﷺ توں آگاہی کیتے اے کانفرنس ٻہوں اہمیت رکھیندی اے ۔او آئی سی گزریل ہجری سال کوں آپ ﷺ دے 1500ویں سال ولادت دی مناسبت نال بعنوان “نبی الرحمہ” مناوݨ دا فیصلہ کیتے۔ ایں مناسبت نال وزارت مذہبی امور پورے ملک اچ صوبائی اتے نجی سطح تے “عشرہ رحمت للعالمین” دے تحت تقریباں اتے محفل سیرت و نعت منعقد کرݨ دا پروگرام جاری کیتے۔ وفاقی وزیر ݙسایا جو “ایں سال سیرت کانفرنس دا موضوع “سوشل میڈیا دے مثبت استعمال دی تعلیم و تربیت اچ ریاستی ذمہ واریاں، سیرت النبی ﷺ دی روشنی اچ” رکھیا ڳئے۔” “مقالات سیرت دے مقابلہ جات دا اعلان کئی مہینے پہلے کیتا ڳیا ہئی، ایں موضوع تے مقالات جات لکھݨ آلیں اتے کتب سیرت و نعت دے لکھاریاں کوں انعاماں نال نوازیا ویسی۔موضوع تے بہترین اتے چُݨیے ڳئے مقالہ جات کوں کتابی شکل ݙے تے پالیسی سازاں اتے نویں نسل دی آگاہی کیتے محفوظ کیتا ویسی۔ انہاں دا آکھݨ ہئی جو وزارت مذہبی امور سیرت لکھاریاں دی بہترین انداز اچ حوصلہ افزائی جاری رکھیسی۔ واضح رہے جو آوݨ آلے مہینے ربیع الاول اچ 50ویں بین الاقوامی سیرت کانفرنس دے موقع تے اہم ملکی و غیر ملکی مذہبی شخصیات اتے سکالرز شرکت کریسن۔ وزارت مذہبی امور اسلام آباد اچ منعقد تھیوݨ آلے جائزہ اجلاس اچ وفاقی سیکرٹری مذہبی امور ڈاکٹر سید عطاء الرحمن، ایڈیشنل سیکرٹری ڈاکٹر ساجد محمود چوہان اتے ٻئے اعلیٰ افسران وی موجود ہن۔