وزیراعظم شہباز شریف دی صدارت اچ اجلاس، برآمدی ہدف ڳھنݨ تے وزارت آئی ٹی دی تعریف، آوݨ آلے سالانہ اہداف، درکار اقدامات تے جامع لائحہ عمل پیش کرݨ دی ہدایت

اسلام آباد۔8اگست (اے پی پی) وزیراعظم محمد شہباز شریف وزارت انفارمیشن ٹیکنالوجی ولوں برآمدات دے گزریل سال دے ہدف 3.8 ارب ڈالر دے حصول کوں سراہندیں ہوئیں آوݨ آلے سالاں دے سالانہ اہداف اتے درکار اقدامات تے جامع لائحہ عمل پیش کرݨ دی ہدایت کیتی اے۔ وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف دی صدارت اچ این آئی ٹی بی اتے وزارت انفارمیشن ٹیکنالوجی دے اقدامات بارے اجلاس جمعے کوں تھیا۔ اجلاس اچ وفاقی وزراء احد خان چیمہ، شزہ فاطمہ خواجہ، وزیراعظم دے کوآرڈینیٹر مشرف زیدی اتے متعلقہ اعلیٰ حکام شرکت کیتی۔ وزیراعظم اجلاس توں خطاب کریندیں ہوئیں آکھیا جو حکومت ڈیجیٹائزیشن نال معیشت دی ترقی اتے ایں کوں عصری تقاضیاں نال ہم آہنگ کرݨ کیتے ترجیحی بنیاداں تے اقدامات کریندی پئی اے، آئی ٹی برآمدات کوں 30 ارب ڈالر تئیں پڄاوݨ کیتے پورا ڈیجیٹل ایکو سسٹم اتے ایں دا انفراسٹرکچر متعارف کرایا ویندا پئے ۔ انہاں ہدایت کیتی جو این آئی ٹی بی دے بنیادی ڈھانچے دی نُوِیں سروں تنظیم اتے مارکیٹ توں بہترین افرادی قوت دی خدمتاں حاصل کیتیاں ونڄن۔ انہاں نینگراں خصوصی طور تریمتاں کوں آئی ٹی دے شعبے اچ روزگار دے حوالے نال خود انحصار بݨاوݨ کیتے سینٹرز دے قیام کوں خوش آئند قرار ݙتا۔ وزیراعظم آکھیا جو ای۔آفس دے اطلاق نال سرکاری دفتراں اچ پیپر لیس گورننس پاروں ویلھے اتے وسائل ݙوہیں دی بچت تھیندی پئی اے، ڈیجیٹل یوتھ ہب توں ہزاراں نینگر باعزت روزگار حاصل کریندے پئن، نینگراں کوں انفارمیشن ٹیکنالوجی شعبے اچ تعلیم تے ہنر فراہم ݙے تے انہاں کوں بین الاقوامی سطح تے مسابقت دی استعداد نال لیس کریندے پئن۔ اجلاس کوں این آئی ٹی بی دی نُوِیں سروں تنظیم بارے پیش رفت اتے وزارت انفارمیشن ٹیکنالوجی دے اقدامات تے بریفنگ ݙتی ڳئی۔ اجلاس کوں ݙسایا ڳیا جو مالی سال 2025 اچ وزارت دے اقدامات پاروں پاکستان دی آئی ٹی شعبے دی برآمدات 19 فیصد نمو دے نال 3.8 ارب ڈالر دا ہدف پار کیتا جݙاں جو ملک اچ فری لانسرز دی تعداد اچ 91 فیصد ودھارا تھیا۔ اجلاس کوں ٻیا ݙسایا ڳیا جو “نیشنل انکیوبیشن سینٹر دے تحت 386 نویں اسٹارٹ۔اَپس کوں معاونت فراہم کیتی ڳئی، 14 کوں عالمی سطح تے بھیجیا ڳیا جݙاں جو ملک دے 26 شہراں اچ 40 ای۔روزگار مراکز قائم کیتے ڳئن، 4 پاکستانی ٹیماں بلیک۔ہیٹ ایم ای اے اچ دنیا دی 50 بہترین ٹیماں اچ شامل تھیاں جݙاں جو 700 ملین ڈالر دی سرمایہ کاری دے معاہدے و مفاہمتی یادداشتاں تھیاں۔ اجلاس کوں ݙسایا ڳیا جو مجموعی طور تے تقریباً 3 لکھ 15 ہزار نینگراں تے تریمتاں کوں آئی ٹی دی پیشہ ورانہ تربیت فراہم کیتی ڳئی جئیں اچ تریمتاں کوں انفارمیشن ٹیکنالوجی اچ ہکو سویں ترقی دے مواقع فراہم کرݨ کیتے تقریباً 1 لکھ 15 ہزار تریمتاں وی شامل ہن، نیشنل انکیوبیشن سینٹر اچ 130 تریمتاں دی سربراہی اچ قائم اسٹارٹ۔اَپس کوں معاونت فراہم کیتی ڳئی جݙاں جو پورے ملک اچ تریمتاں کیتے خصوصی تربیتی مراکز وی ٻݨائے ڳئن۔ اجلاس کوں ٻیا ݙسایا ڳیا جو 2200 وفاقی سرکاری افسراں تے اہلکاراں کوں تربیت ݙتی ڳئی، ایں طرح تقریباً 3 ہزار نینگراں کوں سائبر سکیورٹی اچ تربیت ݙتی ڳئی۔ گورننس دی بہتری کیتے وزیر اعظم دے وژن دے مطابق ڈیجیٹائزیشن بارے بریفنگ ݙیندیں ہوئیں ݙسایا ڳیا جو پاک ایپ دے ذریعے 6.2 ارب روپے دا ٹیکس کٹھا کیتا ڳیا، وفاقی سرکاری دفتراں اچ 98 فیصد ای۔آفس دا اطلاق اتے 51 ایجھیں نویں سسٹمز متعارف کروائے ڳئن جئیں نال گورننس دی بہتری اچ معاونت ملسی، ٹیلی کام سیکٹر بارے بریفنگ اچ ݙسایا ڳیا جو وزارت دے اقدامات دی بدولت گزریل سال اچ 5 لکھ 80 ہزار توں زیادہ لوکاں دی فور جی تئیں رسائی دے ہدف کوں پار کیتا ڳیا، گزریل مالی سال اچ ٹیلی کام کنیکشنز 20 کروڑ دی حد کوں پار کیتا، 10 لکھ نویں انٹرنیٹ استعمال کرݨ آلیاں دے نال نال انٹرنیٹ دے استعمال اچ 24 فیصد ودھارا تھیا۔ اجلاس کوں این آئی ٹی بی بارے ݙسیندیں ہوئیں ݙسایا ڳیا جو ادارے اچ عصری تقاضیاں نال ہم آہنگ نویں نظام دی تشکیل تے کم تکھے جاری اتے آخری مرحلیاں اچ اے، ایں ویلھے این آئی ٹی بی 179 توں ودھ ویب سائٹس، 31 توں ودھ موبائل ایپلیکیشنز، 113 توں ودھ پورٹلز اتے 57 کنسلٹنسی منصوبیاں تے کم کریندا پئے ۔ این آئی ٹی بی دی نُوِیں سروں تنظیم اچ صارف دے تجربے کوں بہترین، مستقبل دی تبدیلیاں کوں سامݨے رکھݨ، جدید انفراسٹرکچر دی تعمیر، گورننس تے سروس ڈیلیوری دی بہتری، سائبر سکیورٹی، رسک مینجمنٹ، تحقیق، جدت اتے افرادی قوت دی استعداد اچ ودھارے کوں سامݨے رکھیا ویندا پئے۔ وزیراعظم سارے اقدامات دی مقررہ مدت اچ تکمیل کوں یقینی بݨاوݨ اتے ملکی آئی ٹی برآمدات کوں آوݨ آلے سالاں اچ 30 ارب ڈالر تے پڄاوݨ کیتے بتدریج سالانہ ودھارے تے مبنی اہداف دا لائحہ پیش کرݨ دی ہدایت کیتی۔