بھارتی میڈیا سچ آکھݨ دا قائل کینی، قوم، پارلیمان، افواج پاکستان اتے میڈیا بھارتی جارحیت دا منہ ٻھن جواب ݙتا، فیک نیوز اتے مس انفارمیشن عالمی سطح تے اہم چیلنج ہن، عطاء اللہ تارڑ

اسلام آباد۔8اگست (اے پی پی) وفاقی وزیر اطلاعات تے نشریات عطاء اللہ تارڑ آپریشن بنیان مرصوص دے حوالے نال پارلیمان دے کردار کوں سراہندیں ہوئیں آکھیا اے جو اتھوں دشمن کوں واضح سنیھا ڳیا جو پاکستان دی پارلیمان افواج پاکستان دے نال کھڑی اے، اپوزیشن اتے حکومتی ارکان پاکستان دا بیانیہ مؤثر انداز اچ پیش کیتا، پوری قوم، پارلیمنٹ، افواج پاکستان اتے میڈیا بھارتی جارحیت دا منہ ٻھن جواب ݙتا، بھارتی میڈیا سچ آکھݨ دا قائل کینی، فیک نیوز اتے مس انفارمیشن عالمی سطح تے اہم چیلنج ہن، آرٹیفیشل انٹیلی جنس دے آوݨ نال اے معاملہ ٻیا ڳوہڑا تھیا۔ وزارت اطلاعات دے اداریاں پی ٹی وی، پی بی سی، اے پی پی، پی آئی ڈی اچ ڈس انفارمیشن کوں روکݨ کیتے میکنزم موجود اے۔ جمعے کوں قومی اسمبلی دے اجلاس اچ وقفہ سوالات اچ رکن قومی اسمبلی شرمیلا فاروقی دے ضمنی سوال دے جواب اچ وفاقی وزیر اطلاعات آکھیا جو آپریشن بنیان مرصوص دے حوالے نال ایں ایوان دا کردار تعریف دے لائق اے، تاریخ اچ اے ضرور لکھیا ویسی جو اتھوں ساری سیاسی جماعتاں ہکو جاہ تھِے تے بہوں چنڳا سنیھا ݙتا، اتھوں دشمن کوں واضح سنیھا ڳیا جو پاکستان دی پارلیمنٹ افواج پاکستان دے نال کھڑی اے بلکہ اپوزیشن اتے حکومتی ارکان ٹی وی چینلز تے پاکستان دا بیانیہ مؤثر انداز اچ پیش کیتا۔ چیئرمین پاکستان پیپلز پارٹی بلاول بھٹو زرداری عالمی میڈیا تے پاکستان دی نمائندگی کیتی اتے بیانیہ دے محاذ تے اہم کردار ادا کیتا، بطور وزیر اطلاعات اے میݙا فرض اے جو انہاں ساری کوششاں کوں تسلیم کیتا ونڄے۔ وفاقی وزیر عطاء اللہ تارڑ آکھیا جو مس انفارمیشن دے حوالے نال ہر ملک دے اندر مہم چلدی اے، آرٹیفیشل انٹیلی جنس دے آوݨ نال اے معاملہ ٻیا ڳوہڑا تھی ڳئے۔ جݙاں تئیں آرٹیفیشل انٹیلی جنس کوں زیادہ ودھارا نئیں ملیا ہا اوں ویلھے تئیں مس انفارمیشن دا معاملہ اتنا پیچیدہ نہ ہا۔ انہاں آکھیا جو معزز رکن کوں 9 صفحیاں دا جواب ݙتا ڳئے۔ وفاقی وزیر آکھیا جو “ورلڈ اکنامک فورم اچ عالمی رہنماواں وی مس انفارمیشن کوں ایں ویلھے دا وݙا چیلنج قرار ݙتا، مس انفارمیشن کہیں دے مفاد اچ کینی، اے نہ سیاسی جماعتاں اتے نہ ہی ملک دے مفاد اچ اے، مس انفارمیشں دے حوالے نال وزارت اطلاعات فیکٹ چیکر دے ناں نال ٹویٹر ہینڈل بݨایا، اساں وزارت دے 1970 دے رولز اچ ترمیم کر تے پاکستان دا پہلا ڈیجیٹل کمیونیکیشن ڈیپارٹمنٹ بݨایا، ایں ڈیپارٹمنٹ اچ جدید سافٹ ویئر استعمال کیتا ویندا پئے، ریسرچ دے ذریعے فیک مواد دی نشاندہی کیتی ویندی اے، اے صرف ہک قدم کافی نئی، ایں عمل کوں ٻیا ودھاوݨ کیتے قومی اتحاد دی لوڑھ اے۔ وفاقی وزیر اطلاعات آکھیا جو پی ٹی وی، پی بی سی، اے پی پی، پی آئی ڈی اچ ڈس انفارمیشن کوں روکݨ کیتے میکنزم موجود اے۔ ہال اچ ای پی ٹی وی ورلڈ انگلش دے ذریعے اساں باقاعدہ طور تے فیک نیوز بسٹر دے ناں نال پروگرام شروع کیتا جئیں بھارتی پروپیگنڈے کوں بے نقاب کیتا، بھارتی میڈیا سچ آکھݨ دا قائل کینی، ایں پوری قوم، ایوان اتے افواج پاکستان اتے میڈیا بھارت کوں منہ ٻھن جواب ݙتا، بھارتی میڈیا آکھیا جو لاہور اتے ملتان دا پورٹ تباہ تھی ڳئے، جݙاں اساں پوری قوم دے نال رَل تے ایں کوں روکیا، اساݙے اتھاں میڈیا ایتھکس ہݨ وی موجود ہن، انٹرنیشنل میڈیا تے میں، بلاول بھٹو زرداری اتے سیاسی جماعتاں دے ارکان پاکستان دی نمائندگی کیتی، میڈیا ہاؤسز ڈومیسٹک فرنٹ تے بیانیہ کوں سنبھالیا ہویا ہا تاں اساں انٹرنیشنل میڈیا تے ونڄ تے اے جنگ لڑ سڳے۔ وفاقی وزیر اطلاعات آکھیا جو مس انفارمیشن کوں روکݨ کیتے مختلف پلیٹ فارمز ہن، اساں فیک نیوز بسٹر دا انگلش پروگرام شروع کر ݙتا اے، بھارتی میڈیا اتے مودی اڄ کتنے کوڑ مارین، فارن پالیسی دے حوالے نال بھارتی ناکامیاں کوں سامݨے گھن آندے ہن۔ وفاقی وزیر آکھیا جو “ڈومیسٹک اتے انٹرنیشنل فرنٹ تے چیلنجز نال نِبڑݨ کیتے پلیٹ فارمز اچ وزارت انفارمیشن ٹیکنالوجی، وزارت اطلاعات اتے وزارت قانون دا وی کردار اے، ایں بارے ایوان دی کمیٹی ٻݨائی ونڄے، اپوزیشن ارکان وی اساݙے نال بہن، اگر ایوان دی کمیٹی چنڳی تجاویز ݙیوے تاں ایں دا کریڈٹ ایں ایوان کوں ویسی جئیں تے اسپیکر قومی اسمبلی سردار ایاز صادق آکھیا جو ایں معاملے کوں وزارت اطلاعات دی کمیٹی اچ چاتا ونڄے۔