”ایگری سٹیک- پاکستان دے زرعی مستقبل کیتے ڈیجیٹل انفراسٹرکچر دی تعمیر” دے عنوان نال اعلیٰ سطحی مشاورتی اجلاس، ایگری سٹیک دا مقصد زراعت دے سٹرکچرل مسئلیں دا حل کڈھݨ اے، شزا فاطمہ خواجہ

اسلام آباد۔8اگست (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ آکھیے جو “ایگری سٹیک دا مقصد زراعت دے سٹرکچرل مسئلیں دا حل کڈھݨ اے، ایگری سٹیک کساناں دی تصدیق شدہ شناخت، زمین متعلق ڈیٹا دے انٹگریشن، درست مشاورتی سہولتاں اتے سبسڈی، فصل انشورنس و کریڈٹ جیھی خدمتاں دی مؤثر فراہمی کوں ممکن بݨیسی۔” وزارت انفارمیشن ٹیکنالوجی و ٹیلی کمیونیکیشن وزارت قومی غذائی تحفظ و تحقیق، لینڈ انفارمیشن اینڈ مینجمنٹ سسٹم (ایل آئی ایم ایس) اتے سپیشل انویسٹمنٹ فیسلیٹیشن کونسل (ایس آئی ایف سی) دی سانجھ نال نیشنل انکیوبیشن سینٹر اسلام آباد اچ ”ایگری سٹیک -پاکستان دے زرعی مستقبل کیتے ڈیجیٹل انفراسٹرکچر دی تعمیر” دے عنوان نال ہک اعلیٰ سطحی مشاورتی اجلاس تھیا ۔ ایں مشاورتی سیشن اچ وفاقی و صوبائی حکومتاں دے نمائندے، ایگری ٹیک سٹارٹ اپس، ٹیلی کام، فن ٹیک اداریں، بین الاقوامی ترقیاتی شراکت داراں، کسان تنظیماں اتے تعلیمی اداریں دے ماہرین آپݨے طور تے اتے آن لائن شرکت کیتی تاں جو زرعی ڈیجیٹلائزیشن کیتے سانجھی سوچ تے اتفاق رائے قائم کیتا ونڄ سڳے۔ وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ خطاب کریندیں آکھیا جو “ایگری سٹیک دا مقصد زراعت دے سٹرکچرل مسئلیں دا حل کڈھݨ اے جنہاں اچ ونڈیا ہویا ڈیٹا، کساناں دی شناخت اتے کریڈٹ ہسٹری دی کمی، سبسڈی دی غیر مؤثر ونڈ اتے کمزور مارکیٹ تئیں رسائی شامل ہن۔” انہاں آکھیا جو “ایگری سٹیک کساناں دی تصدیق شدہ شناخت، زمین متعلق ڈیٹا دے انٹگریشن، درست مشاورتی سہولتاں اتے سبسڈی، فصل انشورنس و کریڈٹ جیھی خدمتاں دی مؤثر فراہمی کوں ممکن بݨیسی۔” اے ہک جامع اتے ٹیکنالوجی تے مبنی زرعی انقلاب دی بنیاد اے جیڑھا جو وزیراعظم شہباز شریف دے وژن ”ڈیجیٹل نیشن پاکستان” دے تحت ایس آئی ایف سی دی سانجھ نال نافذ کیتا ویندا پئے۔” ڈائریکٹر جنرل ایل آئی ایم ایس میجر جنرل (ر) محمد ایوب احسن بھٹی وی اجلاس توں خطاب کیتا اتے ایں انقلابی اقدام دی اہمیت تے روشنی پاتی۔ انہاں آکھیا جو “ایگری سٹیک/پاک گرو ہک منفرد سوچ اے جیڑھی پاکستان دے زرعی شعبے کوں جدید طرز تے بݨیسی، خاص طور تے نِکے کساناں دی زندگیاں اچ بہتری گھن آندیں پالیسی سازی اچ معاونت کریسی۔” چیف ایگزیکٹو افسر ایل آئی ایم ایس ڈاکٹر محمد وقار یاسین وضاحت کیتی جو “ایل آئی ایم ایس ایں منصوبے دی تکنیکی بنیاد دے طور تے کم کریسی اتے پاکستان کیتے نیشنل ایگری ڈیٹا بیس دی حیثیت نال مختلف ذریعے توں ڈیٹا کوں رَل تے فارم دی مخصوص معلومات تیار کریسی تاں جو سارے سٹیک ہولڈرز دیاں لوڑھاں کوں پورا کیتا ونڄ سڳے۔ چیف ایگزیکٹو افسر اگنائٹ رفیق احمد بریرو وفاقی وزیر اتے ڈی جی ایل آئی ایم ایس دے موقف دی تائید کریندیں ایں عزم دا اعادہ کیتا جو محفوظ، ودھݨ دے قابل اتے اوپن ڈیجیٹل انفراسٹرکچر دی تعمیر کیتے بھرپور تعاون ݙتا ویسی تاں جو ایگری سٹیک کوں پورے ملک اچ پائیدار اتے جدید زرعی حل دا ستون بݨایا ونڄ سڳے۔ ایں اقدام دے بنیادی حصیں اچ کساناں دے ڈیجیٹل شناختی کارڈز و رجسٹریز، رضامندی تے مبنی ڈیٹا شیئرنگ، محفوظ ادائیگی دے نظام، سیٹلائٹ توں حاصل کیتی ڳئی فصلاں دی معلومات اتے ڈیجیٹل مارکیٹ پلیٹ فارمز شامل ہن۔ ایں مشاورتی اجلاس دا مقصد حکمرانی دے ڈھانچے تے اتفاق اتے ایل آئی ایم ایس دے ذریعے تکھے نفاذ کوں یقینی بݨاوݨ ہئی۔ شرکا وزارت آئی ٹی و وزارت قومی غذائی تحفظ و تحقیق دی سانجھی سربراہی اچ ہک سٹیئرنگ کمیٹی، ڈیٹا و سائبر سکیورٹی تے مشتمل ہک تکنیکی ورکنگ گروپ اتے سرکاری و نجی شعبیں توں پائلٹ سکواڈز دے قیام دی منظوری ݙتی۔ آوݨ آلے 12 توں 18 مہینے اچ ایں اقدام اچ ترجیحی بنیاداں تے جنہاں پہلواں تے کم کیتا ویسی انہاں اچ سمارٹ سبسڈی، موسمیاتی انڈیکس تے مبنی فصل انشورنس، متبادل ڈیٹا دے ذریعے قرض تئیں رسائی اتے مارکیٹ نال رابطے دا قیام شامل اے۔ اجلاس ایں عزم نال مُکیا جو “ورکنگ گروپس بݨائے ویسن، 3 توں 4 پائلٹ منصوبے شروع کیتے ویسن اتے ہک واضح روڈمیپ دے تحت ماپݨ دے قابل اہداف مقرر کیتے ویسن تاں جو زرعی شعبے کوں ڈیجیٹل طور تے بااختیار بݨایا ونڄ سڳے۔ ایگری سٹیک پاکستان اچ زراعت کوں ڈیجیٹل نظام اچ ݙھالݨ دی ہک کلیدی پیش رفت اے جیڑھی کساناں کوں بااختیار بݨیسی، شفافیت کوں ودھاوا ݙیسی اتے معاشی پائیداری اچ ودھارا کریسی۔ وزارت آئی ٹی پائیدار زرعی مستقبل کیتے نویاں سوچاں اتے شراکت داری کوں ودھاڑا ݙیوݨ دے عزم دا اعادہ کیتا۔