وزیراعظم شہباز شریف دی خصوصی ہدایت تے فلسطین دے مظلوم اتے نہتے شہریاں کیتے امدادی سامان ݙیوݨ دا سلسلہ جاری اے، ہݨ تئیں امدادی سامان دیاں 18 کھیپاں غزہ روانہ کیتیاں ڳئن، عطاء اللہ تارڑ

اسلام آباد۔8اگست (اے پی پی) وفاقی وزیر اطلاعات و نشریات عطاء اللہ تارڑ آکھیے جو وزیراعظم شہباز شریف دی خصوصی ہدایت تے مزید ݙو چارٹرڈ طیاریں دے ذریعے 200 ٹن امدادی سامان غزہ دے نہتے اتے مظلوم شہریاں کیتے روانہ کیتا ویندا پئے، ہݨ تئیں امدادی سامان تے مشتمل 18 جہاز غزہ روانہ کیتے ڳئن ، وزیراعظم شہباز شریف دی ہدایت تے فلسطین دے مظلوم شہریاں دی فلاح و بہبود کیتے عملی اقدامات چاتے ویندے پئن، ہر فورم تے مظلوم اتے نہتے فلسطینیاں دی آواز چاتی ویندی پئی اے، فلسطینی طلبا پاکستان اچ آپݨی میڈیکل تعلیم جاری رکھی ہوئی اے، امدادی سامان ݙیوݨ دا سلسلہ وی جاری اے۔ اتھاں نیشنل ڈیزاسٹر مینجمنٹ اتھارٹی دے زیر اہتمام امدادی سامان دی روانگی دے موقع تے ڳالھ مہاڑ کریندیں وفاقی وزیر اطلاعات آکھیا جو وزیراعظم محمد شہباز شریف ہر فورم تے مظلوم اتے نہتے فلسطینیاں دی آواز چاتی ، پاکستان فلسطینی نہتے شہریاں تے اسرائیل دی طرفوں کیتے ڳئے ظلم دی نہ صرف مذمت کریندے بلکہ آپݨے فلسطینی بھیݨ بھراواں دے نال مکمل یکجہتی دا اظہار کریندےانہاں آکھیا جو “پاکستان فلسطینی بھیݨ بھراواں دے نال یکجہتی دے اظہار اتے انسانی ہمدردی دے جذبے دے تحت مسلسل امدادی سامان غزہ بھیڄیندا پئے، وزیراعظم شہباز شریف دی ہدایت تے ہݨ تئیں امدادی سامان تے مشتمل 18 کھیپاں غزہ روانہ کیتیاں ڳئن ، نیشنل ڈیزاسٹر مینجمنٹ اتھارٹی دے ذریعے ݙو چارٹرڈ طیارے 100، 100 ٹن امدادی سامان اردن پُڄیسن جتھوں اے سامان اردن دے فلاحی ادارے دے ذریعے زمینی رستے نال غزہ تئیں پڄایا ویسی۔ انہاں آکھیا جو وزیراعظم شہباز شریف دی ہدایت تے فلسطین دے مظلوم شہریاں دی فلاح و بہبود کیتے عملی اقدامات چاتے ڳئن، فلسطینی میڈیکل طلبا پاکستان اچ آپݨی تعلیم جاری رکھی ہوئی اے جݙاں جو امدادی سامان ݙیوݨ دا سلسلہ وی جاری اے۔” انہاں آکھیا جو غزہ اچ جاݨ ٻُجھ تے غذائی قلت پیدا کیتی ڳئی اے جیں پاروں شہری اتے ٻال اوکھ دا شکار ہن، اساں انہاں دے ݙکھ کوں سمجھدوں، وزیراعظم شہباز شریف دی ہدایت تے حکومت پاکستان امدادی سامان خاص طور تے کھاوݨ پیوݨ دیاں چیزاں تے دوائیں غزہ دے شہریاں کیتے بھیڄیندی رہی اے اتے بھیجیندی رہسی۔ اساں ایں کم نال مکمل طور تے پرعزم ہیسے، ایں مشن اچ جماعت اسلامی اتے الخدمت فاؤنڈیشن وی حصہ ڳھدا، اساں انہاں دے شکر گزار ہیسے۔ انہاں آکھیا جو حکومت پاکستان غزہ دے مظلوم بھیݨ بھراواں دے نال کھڑی اے، انشاء اللہ انہاں ظلم مک ویسی ۔ تقریب اچ فلسطینی سفیر سودھے حکومتی نمائندے اتے این ڈی ایم اے دے اعلیٰ افسر وی موجود ہن۔ وفاقی وزیر سامان دی وختی روانگی کوں یقینی بݨاوݨ تے این ڈی ایم اے اتے ٻئے فلاحی اداریں دیاں کوششاں دی تعریف کیتی۔