پاکستان جمہوریہ آذربائیجان اتے آرمینیا وچال امریکی صدر ڈونلڈ جے ٹرمپ دی سرپرستی اچ تاریخی امن معاہدے دا خیر مقدم کریندے، وزیراعظم محمد شہباز شریف

اسلام آباد۔9اگست (اے پی پی) وزیراعظم محمد شہباز شریف آکھیے جو “پاکستان جمہوریہ آذربائیجان اتے جمہوریہ آرمینیا وچال امریکی صدر ڈونلڈ جے ٹرمپ دی سرپرستی اچ وائٹ ہاؤس سمٹ اچ تھیوݨ آلے تاریخی امن معاہدے دا خیر مقدم کریندے۔ ایں تاریخی پیشرفت نال کئی ݙھاکیں توں جھیڑے تے انسانی تکلیف دا شکار خطے اچ امن، استحکام اتے تعاون دا ہک نواں دور شروع تھی ڳئے ۔ وزیراعظم سماجی رابطے دی ویب سائٹ “ایکس” تے آپݨی ہک پوسٹ اچ آکھیا جو “اساں صدر الہام علیوف اتے آذربائیجان دے عوام کوں ایں تاریخی معاہدے تے مبارخ ݙیندوں ۔ انہاں دی اے راہ تے چلݨ دانشمندی، دور اندیشی اتے سلیقے کوں ݙیکھیندی اے۔ انہاں آکھیا جو “پاکستان ہمیشہ آذربائیجان دی بھرا قوم دے نال کھڑا رہیے اتے اساں اڄ وی ایں ماݨ دے ویلھے انہاں دے رلے کھڑوں ۔وزیراعظم محمد شہباز شریف آکھیا جو اساں صدر ڈونلڈ ٹرمپ دی قیادت اچ ݙوہیں فریقاں کوں ہک ݙوجھے دے نیڑے گھن آوݨ اتے ہک معاہدے تئیں پڄݨ اچ امریکا دے سہولت کار کردار دی وی تعریف کریندوں ، جیں نال تجارت، رابطے اتے علاقائی انضمام دے نویں رستے کھل ڳئن۔ انہاں امید ظاہر کیتی جو سانجھی ڳالھ مہاڑ دا اے جذبہ جھیڑیں دا سامݨا کرݨ آلے ٻئے خطیں سانڳے وی ھک مثال بݨسی۔