وزیراعظم محمد شہباز شریف دا گلگت بلتستان کیتے 100 میگاواٹ سولر پلانٹ دا وعدہ پورا، ایکنک منظوری ݙے ݙتی

اسلام آباد۔9اگست (اے پی پی) وزیراعظم محمد شہباز شریف دا گلگت بلتستان دے رہائشیاں نال 100 میگاواٹ دے سولر فوٹو وولٹک پاور پلانٹ ݙیوݨ دا ہک ٻیا وعدہ پورا کر ݙتا ڳئے، قومی اقتصادی کونسل دی ایگزیکٹو کمیٹی (ایکنک) وزیراعظم دے اعلان دے ݙو ݙینہاں بعد ہی گلگت بلتستان اچ مختلف علاقیاں کیتے 100 میگاواٹ دے سولر فوٹو وولٹک پاور پلانٹ دے منصوبے دی منظوری ݙے ݙتی اے۔ پی ایم آفس ولوں جاری پریس ریلیز موجب ایکنک دی منظوری دے بعد منصوبے تے باقاعدہ کم شروع تھی ویسی، منصوبہ ترائے سال اچ پورا تھیسی، جیں تے کل 24.957 ارب روپے لاگت آسی۔ آپݨے دورہ گلگت دے دوران وزیراعظم اعلان کیتا ہئی جو ایکنک جلدی ہی گلگت بلتستان کیتے 100 میگاواٹ دے سولر پاور پلانٹ دے منصوبے دی منظوری ݙیسی، سینٹرل ڈویلپمنٹ ورکنگ پارٹی (سی ڈی ڈبلیو پی) پہلے ہی ایں منصوبے دی منظوری ݙے چکی اے۔ واضح ہووے جو استور، داریال، تانگیر، دیامر، گھانچے، غذر، گلگت، ہنزہ، اشکومان، نگر، روندو، سکردو اتے شگر دے ضلعے ایں منصوبے توں فیدہ چیسن۔ منصوبے دے پہلے مرحلے اچ ضلع سکردو کوں 18.958 میگاواٹ بجلی ݙتی ویسی جݙاں جو ݙوجھے مرحلے اچ ہنزہ، گلگت اتے دیامر دے ضلعیں کوں ترتیب وار 6.005 میگاواٹ، 28.013 میگاواٹ اتے 13.126 میگاواٹ بجلی ݙتی ویسی۔ ایویں ترائے مرحلے اچ باقی ضلعیں کوں 16.096 میگاواٹ بجلی حاصل ملسی۔ ایں توں انڄ منصوبہ ہسپتالاں اتے سرکاری دفتراں کوں 18.162 میگاواٹ آف گرڈ بجلی وی ݙیسی۔