چیف آف آرمی سٹاف فیلڈ مارشل سید عاصم منیر دی امریکا دی سینئر سیاسی اتے عسکری قیادت نال ملاقاتاں، ݙو طرفہ پیشہ ورانہ دلچسپی دے امور تے ڳالھ مہاڑ کیتی ڳئی، آئی ایس پی آر

راولپنڈی۔10اگست (اے پی پی) چیف آف آرمی سٹاف فیلڈ مارشل سید عاصم منیر امریکا دے سرکاری دورے دے دوران اتھاں دی سینئر سیاسی اتے عسکری قیادت دے نال نال پاکستانی تارکین وطن نال وی ملاقاتاں اتے ڳالھ مہاڑ کیتی اے۔ آئی ایس پی آر ولوں جاری بیان موجب ٹمپا اچ فیلڈ مارشل رخصت تھیوݨ آلے کمانڈر یونائیٹڈ سٹیٹس سینٹرل کمانڈ (سینٹ کام)، جنرل مائیکل ای کوریلا دی ریٹائرمنٹ دی تقریب اتے ایڈمرل بریڈ کوپر دے کمان سنبھالݨ دی تقریب اچ شرکت کیتی۔ آرمی چیف جنرل کوریلا دی مثالی قیادت اتے ݙو طرفہ فوجی تعاون کوں مضبوط بݨاوݨ اچ انہاں دی مثالی شراکت دی تعریف کیتی، اتے مشترکہ سکیورٹی چیلنجاں نال نِبڑݨ کیتے مسلسل تعاون تے اعتماد دا اظہار کریندیں ہوئیں، ایڈمرل کوپر کیتے نیک خواہشاں دا اظہار کیتا۔ فیلڈ مارشل چیئرمین جوائنٹ چیفس آف سٹاف جنرل ڈین کین نال وی ملاقات کیتی جیں اچ سانجھے پیشہ ورانہ دلچسپی دے امور تے ڳالھ مہاڑ کیتی ڳئی۔ انہاں جنرل کین کوں دورہ پاکستان دی دعوت ݙتی۔ ایں موقع تے آرمی چیف دوست ملکاں دے دفاعی سربراہان نال وی ڳالھ مہاڑ کیتی۔ پاکستانی تارکین وطن دے نال ہک انٹرایکٹو سیشن دے دوران بری فوج دے سربراہ انہاں تے زور ݙتا جو او پاکستان دے روشن مستقبل تے اعتماد رکھن اتے پاکستان اچ سرمایہ کاری دی ترغیب ݙیوݨ اچ فعال طور تے حصہ پاون۔ تارکین وطن پاکستان دی ترقی اتے خوشحالی کیتے آپݨے عزم دا اعادہ کیتا۔