وزیراعظم شہباز شریف نال بلوچستان دے چھل توں متاثرہ پرے دے علاقے توں طالب علم اکرام اللہ کاکڑ دی ملاقات

اسلام آباد۔10اگست (اے پی پی) وزیراعظم محمد شہباز شریف آکھیے جو اکرام اللہ کاکڑ دا خاندان چھل توں ٻہوں متاثر ہئی، 2022 اچ دورہ قلعہ سیف اللہ دے دوران اکرام اللہ نال امدادی کیمپ اچ ملاقات تھئی ہئی۔ ملاقات اچ اکرام اللہ اعلیٰ تعلیم حاصل کرݨ دی خواہش دا اظہار کیتا ہئی اتے میں انہاں دے تعلیمی خرچے چاوݨ دا اعلان کیتا ہئی۔اڄ اے ݙیکھ تے خوشی اے جو اکرام اللہ محنت نال آپݨے مقصد آلے پاسے ودھدے پئن اے ڳالھ وزیراعظم محمد شہباز شریف بلوچستان دے طالب علم اکرام اللہ کاکڑ نال ملاقات اچ آکھی ۔ انہاں اکرام اللہ دا خیرمقدم کیتا۔ ایں موقع تے اکرام اللہ آکھیا جو پچھلی واری میں تساں نال پوزیشن حاصل کرݨ دا وعدہ کیتا ہئی جیڑھا میں پورا کیتا اتے تساں نال ملاقات کیتے آیاں۔ ایں موقع تے وزیراعظم اکرام اللہ کوں یاد ݙیوایا جو گزریل ملاقات اچ تساں ساوی رنگ دی شلوار قمیض پاتی ہوئی ہئی، میکوں چنڳی طرح یاد اے جو ایں ݙینھ ٻہوں چمکدی دھپ ہئی اتے تساں آکھیا ہئی جو اساݙے علاقے اچ کوئی سکول کائنی ، ٻالاں کوں تعلیم حاصل کرݨ کیتے ٻہوں پرے ونڄݨا پوندے۔ میکوں تعلیم حاصل کرݨ دا وݙا شوق اے۔ وزیراعظم آکھیا جو او ویلھے میں اکرام اللہ کوں لارنس کالج گھن آیا ہم۔ انہاں آکھیا جو گزریل ݙینھ جݙاں میں اے خبر پڑھی جو تساں تریجھی پوزیشن حاصل کیتی اے تاں میکوں ٻہوں فخر محسوس تھیا۔ جیں تے اکرام اللہ وزیراعظم دا شکریہ ادا کیتا۔ وزیراعظم محمد شہباز شریف آکھیا جو تُہاݙے استاداں اتے والدین دیاں دعاواں اتے تُہاݙی محنت رنگ گھن آئی اے ۔انہاں آکھیا جو میں سمجھداں جو اے ٻہوں خوشی دی ڳالھ اے جیں تے اللہ تعالیٰ دا شکر ادا کرݨا چاہیدے۔ طالب علم اکرام اللہ وزیراعظم دا شکریہ ادا کیتا اتے آکھیا جو لوک سیاست اچ ہر کہیں کیتے کجھ نہ کجھ کریندن لیکن تُہاݙا رویہ میکوں سیاست توں پرے نظریا، تساں ٻہوں پسماندہ علاقے توں ہک ٻال گھن آتے ایں کوں لارنس کالج اچ تعلیم حاصل کرݨ دا موقع ݙتا۔ انہاں آکھیا جو تساں میکوں ملک دے ہک ٻہوں وݙے تعلیمی ادارے اچ پڑھݨ دا موقع ݙتا۔ انہاں آکھیا جو اساݙے کالج اچ سر فہرست ترائے طلباء کوں سکالر شپ ملدی اے لیکن میں فیصلہ کیتا جو میں ڈٻل سکالر شپ حاصل کریساں۔ میں پہلے وی سکالر شپ تے پڑھدا پیا ہاں اتے الحمد اللہ میں محنت کیتی اتے میکوں اے سکالر شپ ملی اے۔ انہاں آکھیا جو میݙی کامیابی تساݙی احسان مند اے۔ وزیراعظم محمد شہباز شریف طالب علم نال ڳالھ کریندیں آکھیا جو اے سارا کجھ اللہ تعالیٰ دا کرم اے، او انساناں کوں ذریعہ بݨا ݙیندے، میکوں اللہ تعالیٰ توفیق ݙتی اتے تُہاݙے کیتے ذریعہ بݨایا۔ انہاں آکھیا جو اڄ تساں ہک بہترین ادارے اچ تعلیم حاصل کریندے پیو جیڑھا اللہ تعالیٰ دا کرم اے۔ تساں ٻہوں محنت کیتی اے، ایں کالج ٻہوں وݙے وݙے ناں پیدا کیتن۔ اکرام اللہ آکھیا جو میں تے آپݨے ملک دا ٻہوں وݙا قرض اے اتے میں مزید محنت کریساں اتے آپݨی استعداد توں ودھ تے ملک و قوم دی خدمت کریساں۔ وزیراعظم مستقبل دے حوالے نال سوال کیتا تاں اکرام اللہ آکھیا جو میں سی ایس ایس کرݨ چاہندں اتے انٹر میڈیٹ اچ وی محنت کر تے ٻاہرلے ملک سکالر شپ حاصل کرݨ دی کوشش کریساں کیوں جو میکوں ٻلپݨ توں ہی آکسفورڈ ونڄݨ دا شوق اے۔ انشاء اللہ میں ملک و قوم دا ناں اُچا کریساں۔ انہاں آکھیا جو میں تُہاݙے نقش قدم تے چلݨ دی کوشش کریساں کیوں جو تساں وی ملک و قوم کیتے ٻہوں محنت کریندے پئے او۔ اساں سارے طالب علم اے خواہش رکھیندوں جو تُہاݙے جیھا لیڈر میکوں مستقبل اچ وی نصیب تھیوے۔ وزیراعظم دے پچھݨ تے اکرام اللہ ݙسایا جو میں کھیݙاں دے نال نال تقریری مقابلیں اچ وی شرکت کرینداں۔ ایں موقع تے وزیراعظم محمد شہباز شریف طالب علم اکرام اللہ کوں ہک خصوصی تحفہ وی پیش کیتا اتے آکھیا جو اے تحفہ مستقبل اچ تُہاݙی پڑھائی اتے عملی زندگی اچ وی کم آسی۔ واضح رہے جو بلوچستان دے پرے دے علاقے نال تعلق رکھݨ آلا طالب علم اکرام اللہ کاکڑ وزیراعظم محمد شہباز شریف ولوں ݙتی ڳئی سکالر شپ تے لارنس کالج اچ تعلیم حاصل کریندا پئے اتے ایں میٹرک دے امتحان اچ راولپنڈی بورڈ اچ تریجھی پوزیشن حاصل کیتی اے، جیں تے وزیراعظم ملاقات کیتے اکرام اللہ کوں سݙیا ہئی۔ ملاقات اچ وفاقی وزیر اطلاعات و نشریات عطاء اللہ تارڑ، اکرام اللہ دے والدین اتے استاد وی موجود ہن۔