ٹرینیڈاڈ۔11اگست (اے پی پی) ویسٹ انڈیز اتے پاکستان دی کرکٹ ٹیماں دے وچال ترائے ہک ݙینہاں دے بین الاقوامی میچاں تے مشتمل سیریز دا تریجھا اتے فیصلہ کن میچ کَل (منگل کوں) برائن لارا سٹیڈیم، تاروبا، ٹرینیڈاڈ اچ کھیݙیا ویسی۔ اے میچ ݙینھ اتے رات دا ہوسی اتے فلڈ لائٹس دی روشنی اچ کھیݙیا ویسی۔ ایں توں پہلے ݙوہاں ٹیماں دے وچال 3 ٹی ٹوئنٹی بین الاقوامی میچاں دی سیریز پوری تھی ڳئی اے جو پاکستان دی ٹیم 1-2 نال جِت گھدی ہئی۔ ݙوہاں ٹیماں وچال ترائے ون ڈے میچاں دی سیریز 1-1 نال برابر اے۔ پاکستان دی ٹیم پہلے ون ڈے میچ اچ میزبان ویسٹ انڈین ٹیم کوں 5 وکٹاں نال ہرایا ہا جݙاں جو میزبان ٹیم سیریز اچ زور دار واپسی کریندیں ہوئیں پاکستان دی ٹیم کوں ݙوجھے ون ڈے میچ اچ 5 وکٹاں نال ہرا تے سیریز 1-1 نال برابر کر ݙتی ہئی۔ ترائے ون ڈے میچاں دی سیریز دا تریجھا اتے فیصلہ کن میچ کَل منگل کوں کھیݙیا ویسی۔ ݙوہیں ٹیماں دے کپتاناں میچ سودھے سیریز اچ کامیابی کیتے بیان ݙتن اتے تریجھے اتے فیصلہ کن ون ڈے میچ اچ وݙے مقابلے دی امید کیتی ویندی پئی اے۔ ترائے ون ڈے میچاں دی سیریز اچ مشہور وکٹ کیپر بیٹسمین محمد رضوان گرین شرٹس دی قیادت کریسن جݙاں جو ویسٹ انڈیز دی ٹیم کوں شائی ہوپ لیڈ کریسن۔
